مساجد کے لاؤڈ اسپیکر معاملے پر مانخورد شیواجی نگر حلقے میں اہم میٹنگ کا اعلان ابو عاصم اعظمی، یوسف ابراھانی اور سراج شیخ نے علماء، ٹرسٹیان و سماجی اداروں سے شرکت کی اپیل
- MimTimes मिम टाइम्स م ٹائمز
- Jun 23
- 2 min read
23 Jun 2025
ممبئی: مہاراشٹر کے دارالحکومت ممبئی کے مانخورد شیواجی نگر اسمبلی حلقے میں مساجد کے لاؤڈ اسپیکر کے معاملے پر بڑھتی ہوئی بے چینی کے پیش نظر ایک اہم میٹنگ کا انعقاد کیا جا رہا ہے۔ یہ میٹنگ 24 جون بروز پیر، سہ پہر 3 بجے رفیع نگر میڈیکل سینٹر میں منعقد ہوگی۔سماج وادی پارٹی کے ریاستی صدر و رکن اسمبلی ابو عاصم اعظمی، سابق ایم ایل اے یوسف ابراھانی اور سابق کارپوریٹر محمد سراج شیخ نے تمام علماء کرام، مساجد کے ٹرسٹیان اور دیگر ذمہ داران سے اس میٹنگ میں شرکت کی پرزور اپیل کی ہے۔ابو عاصم اعظمی نے کہا کہ:"جتنی بھی مسجدیں ہیں، ان کے امام، ٹرسٹی اور لاؤڈ اسپیکر معاملے سے وابستہ تمام افراد اس میٹنگ میں ضرور شرکت کریں۔ اسمبلی کا اجلاس بھی جلد شروع ہونے والا ہے، اس سے قبل ہم سب کو ایک پلیٹ فارم پر جمع ہو کر مشورہ کرنا ہے تاکہ کوئی ایسا راستہ نکالا جائے جس سے قانونی دائرے میں رہتے ہوئے ہمارے دینی امور بھی متاثر نہ ہوں اور پولیس سے کوئی جھگڑا بھی نہ ہو۔"سابق ایم ایل اے یوسف ابراھانی نے کہا کہ:"ہمیں یہ مسئلہ بہت پیار، محبت اور شانتی سے حل کرنا ہے۔ میٹنگ میں بیٹھ کر سنجیدہ گفت و شنید ہونی چاہیے۔ میری تمام ٹرسٹیان، علماء کرام اور این جی اوز سے گزارش ہے کہ وہ اس میٹنگ میں ضرور شریک ہوں۔"وہیں، سابق کارپوریٹر محمد سراج شیخ نے کہا کہ:"لاؤڈ اسپیکر کے معاملے میں آج پورے مہاراشٹر کے مسلمان فکرمند ہیں۔ ہمیں قانونی اور سیاسی طور پر ایک مضبوط لائحہ عمل طے کرنا ہوگا۔ انشاءاللہ، اگر ہم اتحاد اور پرامن طریقے سے پیش آئیں تو اللہ کے فضل سے اس مسئلے کا 100 فی صد حل نکلے گا۔"اس میٹنگ کو نہ صرف لاؤڈ اسپیکر کے مسئلے پر مسلمانوں کی اجتماعی حکمت عملی طے کرنے کے لیے اہم قرار دیا جا رہا ہے بلکہ اسے مسلم قیادت کے اتحاد اور شعور کی ایک اہم کڑی بھی سمجھا جا رہا ہے۔
