پیدائش، اموات اور شادی کے سرٹیفکیٹ اب تین دفتری دنوں میں دستیاب، بی ایم سی کے شہری سہولت مراکز میں رجسٹریشن اور تصحیح کی درخواستیں قبول کرنے کا آغاز، پرانے سرٹیفکیٹ کو کیو آر کوڈ میں تبدیل

11 August 2026

ممبئی(م ٹائمز ) برہن ممبئی میونسپل کارپوریشن نے شہریوں کو پیدائش، اموات اور شادی کے سرٹیفکیٹ سے متعلق خدمات فراہم کرنے کے عمل کو مزید آسان اور تیز بنانے کا فیصلہ کیا ہے۔ بی ایم سی کے انتظامی دفاتر میں قائم شہری سہولت مراکز کے ذریعے پیدائش و اموات رجسٹریشن کے آن لائن پورٹل کا استعمال کرتے ہوئے نئے سرٹیفکیٹ کے ساتھ مختلف نوعیت کی تصحیح کی درخواستیں بھی قبول کی جا رہی ہیں۔

بی ایم سی کے مطابق نئی پیدائش، موت یا شادی کے سرٹیفکیٹ کے لیے درخواست دینے کے بعد سرٹیفکیٹ تقریباً تین دفتری دنوں میں دستیاب کرانے کی کوشش کی جائے گی۔ اسی طرح بچے کے پیدائش سرٹیفکیٹ میں نام درج کرنے کی سہولت بھی پیدائش کے 15 سال کے اندر تین دفتری دنوں میں فراہم کی جائے گی۔ شادی کے سرٹیفکیٹ میں تصحیح بھی تین دفتری دنوں میں کی جائے گی، جبکہ پیدائش اور موت کے سرٹیفکیٹ میں مختلف قسم کی تصحیحات کے لیے 25 دفتری دنوں کی مدت مقرر کی گئی ہے۔

پیدائش اور موت کے سرٹیفکیٹ میں مختلف تصحیحات کی سہولت

شہری اب بچے کے پیدائش سرٹیفکیٹ میں نام شامل کرنے، والدین کے نام میں تصحیح، مستقل یا عارضی پتے میں تبدیلی، تاریخ پیدائش میں غلطی کی اصلاح اور جنس سے متعلق غلطی کی تصحیح کے لیے درخواست دے سکتے ہیں۔ اسی طرح موت کے سرٹیفکیٹ میں تصحیح، پرانے سرٹیفکیٹ کو کیو آر کوڈ والے نئے سرٹیفکیٹ میں تبدیل کرنے اور شادی کے سرٹیفکیٹ میں تصحیح کے لیے بھی درخواستیں قبول کی جا رہی ہیں۔

بی ایم سی نے واضح کیا ہے کہ پیدائش اور موت کے سرٹیفکیٹ میں تصحیح مقررہ طریقہ کار کے تحت زیادہ سے زیادہ 25 دفتری دنوں میں مکمل کرنے کی کوشش کی جائے گی۔ شہریوں کو درخواست کے ساتھ مطلوبہ دستاویزات فراہم کرنا ضروری ہوگا۔

درخواست کی صورتحال یونیک آئی ڈی سے معلوم کی جا سکے گی

شہری سہولت مراکز پر مختلف خدمات اور درخواست کے طریقہ کار سے متعلق معلوماتی بورڈ بھی نصب کیے جا رہے ہیں۔ درخواست جمع کرانے کے بعد دی جانے والی رسید پر درج یونیک آئی ڈی کے ذریعے شہری اپنی درخواست کی صورتحال کے بارے میں وقتاً فوقتاً معلومات حاصل کر سکیں گے۔

بی ایم سی کمشنر اشونی بھیڑے نے اس نئی سہولت کے بارے میں شہریوں میں وسیع پیمانے پر بیداری پیدا کرنے کی ہدایت دی ہے۔ ایڈیشنل میونسپل کمشنر شہر پرجکت ورما لوانگڑے نے بھی شہری سہولت مراکز میں معلوماتی بورڈ لگانے اور درخواست جمع کرانے کے عمل کو مزید آسان بنانے کے ساتھ شہریوں کو مناسب معلومات فراہم کرنے کے لیے بڑے پیمانے پر آگاہی مہم چلانے کی ہدایت دی ہے۔

پرانے سرٹیفکیٹ کو کیو آر کوڈ والے سرٹیفکیٹ میں تبدیل کرنے کی سہولت

بی ایم سی نے پرانے پیدائش اور موت کے سرٹیفکیٹ کو نئے کیو آر کوڈ والے سرٹیفکیٹ میں تبدیل کرنے کے لیے شہری سہولت مراکز میں الگ کھڑکی کی سہولت بھی فراہم کی ہے۔ پرانے سرٹیفکیٹ کی دستیابی اور بی ایم سی کے متعلقہ وارڈ کی سطح پر موجود ریکارڈ کی تصدیق کے بعد نیا کیو آر کوڈ والا سرٹیفکیٹ جاری کیا جائے گا۔

اگر مقامی سطح پر متعلقہ ریکارڈ دستیاب نہ ہو یا اسے تلاش کرنے میں دشواری ہو تو سرٹیفکیٹ جاری ہونے میں مزید وقت لگ سکتا ہے۔ اس سہولت کے لیے پیدائش یا موت کے سرٹیفکیٹ کی اصل کاپی پیش کرنا ضروری ہوگا۔ بی ایم سی کے مطابق پرانے سرٹیفکیٹ کو نئے کیو آر کوڈ والے سرٹیفکیٹ میں تبدیل کرنے کا عمل عام طور پر 25 دفتری دنوں میں مکمل کرنے کا ہدف رکھا گیا ہے۔

شہری سہولت مراکز پر دستیاب اہم خدمات

شہری اب شہری سہولت مراکز پر بچے کے پیدائش سرٹیفکیٹ میں تصحیح، موت کے سرٹیفکیٹ میں تصحیح، پرانے پیدائش یا موت کے سرٹیفکیٹ کو نئے کیو آر کوڈ والے سرٹیفکیٹ میں تبدیل کرنے اور نئے پیدائش، موت یا شادی کے سرٹیفکیٹ کے لیے درخواست دے سکتے ہیں۔

بی ایم سی نے واضح کیا ہے کہ درخواستوں پر کارروائی پیدائش و اموات رجسٹریشن قانون 1969 کی دفعہ 15، ترمیم شدہ قانون 2023 اور مہاراشٹر کے چیف رجسٹرار، پیدائش و اموات کی جانب سے جاری کردہ 18 جون 2026 کے سرکلر کے مطابق کی جائے گی۔

بی ایم سی نے یہ بھی واضح کیا ہے کہ مقررہ مدت درخواست کی معیاری دفتری مدت ہے۔ اصل میں سرٹیفکیٹ دستیاب ہونے کا وقت شہری رجسٹریشن نظام کی ویب سائٹ، انٹرنیٹ کی دستیابی، تحریری دستاویزات کے ریکارڈ، متعلقہ محکمہ کے کام کے بوجھ اور پرانے سرٹیفکیٹ کی مرکزی سطح پر منظوری جیسے عوامل پر منحصر ہوگا۔ اس لیے بعض معاملات میں مقررہ مدت سے زیادہ وقت بھی لگ سکتا ہے۔