तानसा तलाव ओसंडला; मुंबईच्या पाणीसाठ्यात लक्षणीय वाढ
- MimTimes मिम टाइम्स م ٹائمز
- Jul 23
- 1 min read
23 July 2025
मुंबई, मुंबईकरांसाठी दिलासादायक बातमी आहे. शहराला पाणीपुरवठा करणाऱ्या सात जलाशयांपैकी एक असलेला तानसा तलाव आज (२३ जुलै) संध्याकाळी ५ वाजून ४० मिनिटांनी ओसंडून वाहू लागला आहे. ही माहिती बृहन्मुंबई महानगरपालिकेच्या जल अभियंता विभागामार्फत देण्यात आली.
मुंबईला पाणीपुरवठा करणाऱ्या प्रमुख तलावांमध्ये मागील काही दिवसांपासून जोरदार पावसामुळे जलसाठ्यात झपाट्याने वाढ झाली आहे. आज सकाळी ६ वाजता करण्यात आलेल्या मोजणीनुसार, सातही तलाव एकूण क्षमतेच्या ८६.८८% भरले आहेत. या पार्श्वभूमीवर आधीच ७ जुलैला मध्य वैतरणा जलाशयाचे दरवाजे उघडण्यात आले होते, तर ९ जुलैला मोडक सागर ओसंडून वाहू लागला होता. आता तानसा तलावानेही आपली मर्यादा ओलांडली आहे.
तानसा धरण ठाणे जिल्ह्यातील शहापूर तालुक्यात स्थित असून, हे सर्वात जुने दगडी धरण म्हणून ओळखले जाते. याची एकूण जलधारण क्षमता १४,५०८ कोटी लीटर (१४५.०८ टीएमसी) इतकी आहे.
त्यानुसार, यावर्षी तानसा तलाव २३ जुलैला भरून वाहू लागला आहे. मागील वर्षी (२०२४) हा तलाव २४ जुलै रोजी पहाटे ४:१६ वाजता ओसंडला होता. याआधी २०२३ मध्ये २६ जुलै, २०२२ मध्ये १४ जुलै, २०२१ मध्ये २२ जुलै आणि २०२० मध्ये २० ऑगस्ट रोजी तानसा तलाव भरून वाहू लागला होता.
सततच्या दमदार पावसामुळे लवकरच उर्वरित तलावदेखील पूर्ण क्षमतेने भरतील, अशी अपेक्षा आहे. यामुळे आगामी काही महिन्यांसाठी मुंबईकरांना पाणीकपातीपासून दिलासा मिळण्याची शक्यता आहे.
