न्यायालयीन अपीलमुळे बाधित नगरपरिषदा व नगरपंचायतींसाठी सुधारित निवडणूक कार्यक्रम जाहीर
- MimTimes मिम टाइम्स م ٹائمز
- 36 minutes ago
- 2 min read
30 November 2025
मुंबई (मिम टाइम्स)राज्य निवडणूक आयोगाने न्यायालयीन अपील दाखल झालेल्या नगरपरिषदा व नगरपंचायतींमधील सार्वत्रिक निवडणुकांसाठी सुधारित कार्यक्रम-२०२५ जाहीर केला आहे. आयोगाचे सचिव, सुरेश काकाणी यांच्या स्वाक्षरीने हा आदेश २९ नोव्हेंबर २०२५ रोजी जारी करण्यात आला आहे.
ज्या प्रकरणात नामनिर्देशनपत्रांच्या छाननीनंतर निवडणूक निर्णय अधिकाऱ्यांच्या निर्णयाविरोधात उमेदवारांनी जिल्हा न्यायालयात अपील दाखल केले होते, आणि त्या अपीलांवरील निकाल दि. २२/११/२०२५ पर्यंत होणे आवश्यक होते, परंतु ते निकाल दि. २३/११/२०२५ किंवा त्यानंतर लागले, अशा ठिकाणी नियमांचे पालन झाले नसल्याचे आयोगाच्या निदर्शनास आले आहे. काही प्रकरणात अपीलाचा निकाल उशिराने लागल्यानंतरही, लेखी निकाल प्राप्त न होता, अपीलाची सुनावणी झाली नसतांना, किंवा न्यायालयाच्या निकालाच्या अधीन राहून निवडणूक निर्णय अधिकाऱ्यांनी उमेदवारांना नामनिर्देशनपत्र माघारी घेण्यासाठी आवश्यक कालावधी न देताच निवडणूक चिन्ह वाटप केले. त्यामुळे दि. २६/११/२०२५ किंवा त्यानंतर केलेली चिन्ह वाटपाची कार्यवाही नियमबाह्य ठरते.
pdf file
त्यामुळे, अशा नगरपरिषदा व नगरपंचायतींच्या फक्त संबंधित सदस्य पदाच्या जागेकरीता आणि अशा नगरपरिषदा/नगरपंचायतींचे अध्यक्ष पद असल्यास संपूर्ण नगरपरिषद/नगरपंचायतीच्या अध्यक्ष पदासाठी सध्या सुरु असलेली निवडणूक प्रक्रिया स्थगित करून, नियमानुसार पूर्ण झालेल्या टप्प्यांपासून पुढील टप्प्यांसाठी सुधारित कार्यक्रम देण्यात येत आहे.
सुधारित निवडणूक कार्यक्रम
जिल्हाधिकाऱ्यांनी निवडणूक कार्यक्रम ०४/१२/२०२५ रोजी जारी करणे आवश्यक आहे. नामनिर्देशनपत्रे मागे घेण्याचा अंतिम दिनांक १०/१२/२०२५ दुपारी ०३.०० वाजेपर्यंत असेल. आवश्यकतेनुसार निवडणूक चिन्ह नेमून देण्याचा तसेच अंतिमरित्या निवडणूक लढविणाऱ्या उमेदवारांची यादी प्रसिध्द करण्याचा दिनांक ११/१२/२०२५ आहे.
आवश्यक असल्यास मतदानाचा दिनांक २०/१२/२०२५ असून, मतदानाची वेळ सकाळी ७.३० पासून ते सायंकाळी ५.३० पर्यंत असेल. मतमोजणी व निकाल जाहीर करण्याचा दिनांक २१/१२/२०२५ सकाळी १०.०० वाजल्यापासून असेल. शासन राजपत्रात निकाल दि. २३/१२/२०२५ पूर्वी प्रसिध्द करणे बंधनकारक आहे.
आचारसंहिता आणि निर्देश
निवडणुकीची आचारसंहिता निवडणूक कार्यक्रम निर्गमित केलेल्या वेळेपासून लागू होऊन निवडणुकीचा निकाल जाहीर होईपर्यंत अंमलात राहील. सदस्य पदाची निवडणूक असल्यास ती आचारसंहिता त्या प्रभागापुरती आणि अध्यक्ष पदासाठी असल्यास संपूर्ण नगरपरिषद/नगरपंचायतींच्या क्षेत्रास लागू राहील. सदर क्षेत्रातील मतदारांवर प्रलोभन देणारी कोणतीही कृती/घोषणा कोणत्याही मंत्री, खासदार, आमदार, नगरसेवक किंवा इतर पदाधिकाऱ्यांना इतरत्र सुध्दा करता येणार नाही.
जिल्हाधिकारी यांनी आपल्या जिल्ह्यातील ज्या जागेसाठी अपील दाखल होते परंतु अपीलाचा निकाल दि. २३/११/२०२५ किंवा तद्नंतर देण्यात आलेला आहे, अशा नगरपरिषदा व नगरपंचायतींच्या सदस्य पदाच्या जागांच्या निवडणुका दि. ०४/११/२०२५ रोजीच्या कार्यक्रमानुसार घेऊ नयेत. तसेच, अशा प्रकरणात अध्यक्ष पदाचा समावेश असल्यास त्या संपूर्ण नगरपरिषदेची निवडणूक स्थगित करण्यात आली आहे. स्थगित झालेल्या जागांची व पदांची माहिती संकलित करून जिल्हाधिकाऱ्यांनी सोबत जोडलेल्या परिशिष्ट-१ मधील वेळापत्रकानुसार सुधारित सार्वत्रिक निवडणुकीचा कार्यक्रम राबवावा.
