मुंबई महापालिकेत कनिष्ठ पर्यवेक्षक पदोन्नतीसाठी लाखोंची बोली? “सेवा ज्येष्ठतेनुसारच पदोन्नती होणार!”:महापालिका प्रशासन

29 July 2025

प्रतिनिधी | सचिन व्ही.

मुंबई, मुंबई महापालिकेच्या घन कचरा व्यवस्थापन विभागात कनिष्ठ पर्यवेक्षक पदोन्नतीसाठी लाखोंच्या बोली लावल्याच्या चर्चा रंगल्या असताना, प्रशासनाने स्पष्ट इशारा दिला आहे की पदोन्नती ही केवळ सेवा ज्येष्ठतेनुसारच दिली जाणार आहे. त्यामुळे कोणत्याही आमिषाला बळी पडू नका, असे आवाहन पालिका अधिकाऱ्यांनी कर्मचाऱ्यांना केले आहे.

सदर विभागात २५ जून २०२५ पासून १०६ कनिष्ठ पर्यवेक्षक पदांसाठी अर्ज मागवले गेले आहेत. यासाठी पात्रता म्हणून बारावी आणि पंधरावी उत्तीर्ण होणे, तसेच स्वच्छता निरीक्षक परिक्षा उत्तीर्ण करणे आवश्यक आहे. मात्र, यासोबतच सेवा ज्येष्ठता हा मुख्य निकष आहे, असे पालिकेने स्पष्ट केले.

विश्वसनीय सूत्रांकडून मिळालेल्या माहितीनुसार, काही एजंट किंवा दलालकडून कर्मचाऱ्यांना पदोन्नतीसाठी लाखों रुपये देण्याचे आमिष दाखवले जात आहे. कनिष्ठ पर्यवेक्षक पदावर काम करणाऱ्यांना प्रत्यक्ष साफसफाईचे काम न करता इतर कर्मचाऱ्यांकडून ते काम करवून घेण्याची जबाबदारी असते. तसेच, या पदाचे वेतनही इतर पदांपेक्षा अधिक असल्यामुळे काही कर्मचारी पदोन्नतीसाठी गैरमार्गाने प्रयत्न करत असल्याचे सांगण्यात येत आहे.

पालिकेच्या अधिकाऱ्यांनी स्पष्ट केले की, “कनिष्ठ पर्यवेक्षक पदोन्नती ही पूर्णपणे नियम व सेवा ज्येष्ठतेनुसारच होईल. पैशाच्या जोरावर पद मिळणार नाही. जर कोणत्याही कर्मचाऱ्याने किंवा दलालाने अशा प्रकारचा व्यवहार केल्याचे आढळले, तर त्यांच्यावर कठोर कारवाई केली जाईल.”

या पार्श्वभूमीवर, पालिका प्रशासनाकडून कर्मचाऱ्यांना सतर्क राहण्याचे आवाहन करण्यात आले आहे आणि कोणत्याही अनधिकृत व्यवहारात सहभागी न होण्याचे स्पष्ट निर्देश देण्यात आले आहेत.

आपण काय करू शकता?

• कोणालाही पदोन्नतीसाठी पैसे देऊ नका.

• कोणाकडूनही अशी मागणी झाल्यास त्वरित वरिष्ठ अधिकाऱ्यांना किंवा भ्रष्टाचार प्रतिबंधक विभागाला माहिती द्या.

• नियम व सेवा ज्येष्ठतेनुसारच आपली प्रगती निश्चित होईल, हे लक्षात ठेवा.

#BMC #PromotionScam #SolidWasteManagement #MumbaiNews #CorruptionAlert #BMCJobs #EmployeeRights #PromotionRules #AntiCorruption #Transparency