सुप्रिया सुळेंचा सरकारवर थेट हल्लाबोल : “महादेव मुंडे प्रकरणात उशिरा का होईना, पण कारवाई झाली – आता जबाबदारीची वेळ”
- MimTimes मिम टाइम्स م ٹائمز
- Aug 2
- 2 min read
2 August 2025
मुंबई,राष्ट्रवादी काँग्रेसच्या खासदार सुप्रिया सुळे यांनी महादेव मुंडे हत्या प्रकरण, दौंडमधील तणाव आणि पुण्यातील दादागिरीविरोधात थेट सरकारला जाब विचारत जोरदार टीका केली आहे. “महादेव मुंडे यांच्या कुटुंबाला दोन वर्षांनी उशिरा का होईना न्याय मिळवून देण्यासाठी एसआयटी स्थापन झाली, त्याबद्दल मी मुख्यमंत्र्यांचे आभार मानते. पण इतक्या वेळ कारवाई का झाली नाही, हेही विचारण्याची वेळ आली आहे,” असं म्हणत त्यांनी भावनिक आणि धारदार भाषेत आपली भूमिका मांडली.
महादेव मुंडे हत्या प्रकरणात एसआयटी उशिरा का स्थापन झाली?
“22 ऑगस्ट 2023 रोजी महादेव मुंडे यांची क्रूरपणे हत्या झाली. जवळपास दोन वर्ष झाली तरीही त्यांच्या कुटुंबाला न्याय मिळाला नाही. सतत त्यांच्या पत्नी, जितेंद्र आव्हाड, बीडचे खासदार बाप्पा, माजी मंत्री सुरेश धस यांनी पाठपुरावा केला, पण सरकारकडून उत्तर नव्हतं. मी स्वतः त्याच्या घरी भेट देऊन आले. रोहित पवारही नुकतेच तिथे गेले होते. शेवटी त्यांच्या पत्नीने आत्मदहनाचा प्रयत्न केला. इतक्या टोकाला कुठलंच कुटुंब जायला नको!” असं सांगत सुळेंनी सरकारच्या निष्क्रीयतेवर गंभीर प्रश्न उपस्थित केला.
दौंडमध्ये तणाव, पण लोकशाहीत चर्चेची गरज
पुणे जिल्ह्यातील यवत (दौंड) येथे दोन गटांमध्ये निर्माण झालेल्या तणावावरही सुप्रिया सुळे यांनी चिंता व्यक्त केली. “दौंड हा संवेदनशील आणि सुसंस्कृत तालुका आहे. आम्ही इथं अनेक दशकांपासून गुण्यागोविंदाने राहतो. कालची घटना अत्यंत दुर्दैवी आहे. मी स्थानिक आमदार राहुल कुल आणि जिल्हा पोलिसप्रमुखांशी चर्चा केली. आमच्यात राजकीय मतभेद असले तरी त्यांनी सहकार्याची भूमिका घेतली, त्याबद्दल मी त्यांचे आभार मानते,” असं सुळे म्हणाल्या.
बाहेरून येऊन गडबड करणाऱ्यांना आवरा
सुळे म्हणाल्या, “अप्पासाहेब पवार आणि सोहेलभाई खान यांनी घटनास्थळी जाऊन माहिती घेतली. कार्यकर्त्यांशी संवाद साधला. दौंडमध्ये अशा घटना पूर्वी कधी घडल्या नाहीत. आता बाहेरून कोणी येऊन भडक भाषणं करीत असेल, टीका करत असेल, गडबड करत असेल, तर त्यांना आवरा.”
मुख्यमंत्र्यांना सवाल : “दादागिरी माहीत आहे, मग कारवाई का नाही?”
मुख्यमंत्री एकनाथ शिंदे यांनी पुण्यात दादागिरी वाढल्याचं म्हटलं. त्यावर प्रत्युत्तर देताना सुप्रिया सुळे म्हणाल्या, “तुमचं सरकार आहे, गृहमंत्री तुमच्याच पक्षाचे आहेत, मग पुण्यात दादागिरी वाढली आहे हे माहीत असून तुम्ही काय कारवाई केली? गुंतवणूक येत नसेल तर त्याला जबाबदार कोण?”
अजित पवारांना विनंती : “दौंडने तुम्हाला भरभरून दिलं आहे”
शेवटी उपमुख्यमंत्री अजित पवार यांच्याकडे भावनिक साद घालत सुळे म्हणाल्या, “दौंडने अजितदादांना भरभरून प्रेम दिलं आहे. तुम्ही पालकमंत्री आहात, त्यामुळे तुमच्यावर जबाबदारी आहे की बाहेरून येऊन गोंधळ घालणाऱ्यांना आवरा. आपल्या तालुक्यात शांतता आणि सौहार्द टिकावं, ही आपली सामूहिक जबाबदारी आहे.”
राजकीय वातावरण तापलेले
सुप्रिया सुळे यांच्या या ठाम आणि स्पष्ट भूमिकेमुळे राज्यातील राजकीय वातावरण पुन्हा एकदा तापले आहे. महादेव मुंडे हत्या प्रकरण, दौंडमधील तणाव आणि पुण्यातील गुन्हेगारीविरोधात सरकारकडून ठोस पावलं उचलली जातात का, हे पाहणं महत्त्वाचं ठरणार आहे.
