"بچوں کی تعلیم و تربیت ایک دینی فریضہ ہے" — نصیر اصلاحیفاروق ستار عمر بھائی ہائی اسکول میں "پرورش" ورکشاپ کا انعقاد

یونیفائیڈ ایجوکیشن فاؤنڈیشن کے زیر اہتمام، 12 جولائی 2025 بروز سنیچر، فاروق ستار عمر بھائی ہائی اسکول، جوگیشوری میں آٹھویں اور نویں جماعت کے طلبہ کے والدین کے لیے ایک رہنمائی ورکشاپ بعنوان "پرورش" منعقد کی گئی۔ یہ نشست صبح 9:15 سے 11:30 تک جاری رہی۔

پروگرام کا آغاز محترمہ ثنا کی تلاوتِ قرآن (سورہ طور: آیت 17 تا 28) اور اردو ترجمہ سے ہوا۔ اسکول کے پرنسپل اشرف ریشم والا نے ورکشاپ کی غرض و غایت پر روشنی ڈالی۔ فاؤنڈیشن کی سیکریٹری ریحانہ دیشمکھ نے ادارے کا تعارف پیش کرتے ہوئے کہا کہ یو ای ایف بچوں کی تعلیمی و اخلاقی تربیت کے ساتھ ساتھ والدین کی رہنمائی کو بھی اپنی ترجیح بنائے ہوئے ہے۔ اس مقصد کے لیے چار ماڈیولز پر مشتمل ایک تربیتی سیریز مختلف اسکولوں میں جاری ہے۔

مجلسِ علماء مہاراشٹر کے ناظمِ اعلیٰ نصیر اصلاحی نے "بچوں کے ساتھ والدین کا رویہ" کے عنوان سے خطاب کرتے ہوئے کہا کہ "بچوں کی تعلیم و تربیت صرف ایک دنیاوی معاملہ نہیں بلکہ ایک دینی فریضہ ہے، جسے ایمان کا حصہ سمجھ کر انجام دینا چاہیے۔" انہوں نے والدین کو نبی ﷺ کی اس حدیث کی یاد دہانی کرائی جس میں اولاد کو بہترین تحفہ تعلیم و تربیت قرار دیا گیا ہے۔

جماعت اسلامی ہند، نوی ممبئی کے ناظم ضمیر الحسن نے "گھر کے ماحول کا کردار" پر بات کرتے ہوئے والدین کو گھر میں محبت، شکرگزاری، سیکھنے سکھانے اور دعا کا ماحول قائم کرنے کی ترغیب دی۔ ان کا کہنا تھا کہ بچے والدین کی عملی زندگی سے سب سے زیادہ سیکھتے ہیں۔

پروگرام کی نظامت ذاکر صاحب نے کی اور مستقیم صاحب نے اختتامی کلمات کے ساتھ اسکول انتظامیہ، مقررین اور والدین کا شکریہ ادا کیا۔

ورکشاپ میں 61 والدین نے شرکت کی۔ اسکول کے پرنسپل اشرف ریشموالا نے اس نشست کو مؤثر، قابلِ فہم اور عملی رہنمائی سے بھرپور قرار دیا۔