معذور افراد کے لیے آسان اور باوقار سفر کے لیے' سنگمنے یاترا 'ایک نئی پہل

12 February 2025

ممبئی ،معذور افراد کو شمولیت اور نقل و حرکت کے مساوی حقوق فراہم کرنے کے مقصد سے، مرکزی حکومت کے زیر اہتمام "سنگمنے یاترا" کا آغاز کیا گیا۔ یہ مہم 7 فروری سے 11 فروری تک جاری رہی، جس کے دوران معذور افراد کو مذہبی اور سیاحتی مقامات پر بغیر کسی رکاوٹ کے سفر کی سہولت فراہم کرنے کے بارے میں آگاہی دی گئی۔معذور افراد کے لیے سرکاری عمارتوں، مذہبی و تفریحی مقامات، اور دیگر اہم جگہوں تک آسان رسائی کو یقینی بنانے کے لیے "Yes to Access" ایپ کے ذریعے بھی آگاہی مہم چلائی گئی۔

اس مہم کا آغاز 7 فروری کو حاجی علی درگاہ ممبئی سے ہوا، جہاں معذور فلاح و بہبود کمشنریٹ، مہاراشٹر ریاست، پونے اور معاون کمشنر سماجی فلاح و بہبود، ممبئی شہر کے اشتراک سے یاترا کو ہری جھنڈی دکھائی گئی۔مرکزی اور ریاستی حکومت کی جانب سے اس مہم کے دوران 10 فروری کو ممبئی میں واقع ڈپٹی کمشنر چیریٹیبل کمشنریٹ، سرکاری دفاتر اور نہرو پلانیٹیریم میں معذور افراد کے لیے سہولیات کے موضوع پر ایک نشست منعقد کی گئی۔

اس موقع پر علاقائی ڈپٹی کمشنر ویبھَو جادھو اور پبلک ریلیشن آفیسر پرلاد کوکاٹے نے معذور افراد کو درپیش چیلنجز اور ان کے حل پر تبادلہ خیال کیا۔اسی طرح 11 فروری کو شری سدھی ونائک مندر کے ایگزیکٹو آفیسر وی پاٹل اور ٹرسٹی ممبران سے ملاقات کی گئی،

جس کے بعد چیتیہ بھومی کا بھی دورہ کیا گیا۔یہ مہم معذور فلاح و بہبود کمشنریٹ، مہاراشٹر ریاست، پونے، معاون کمشنر سماجی فلاح و بہبود، ممبئی شہر، ضلع معذور بحالی مرکز ماہم، نیشنل انسٹی ٹیوٹ آف انٹلیکچوئل ڈِس ایبلٹیز (نوی ممبئی)، علی یاور جنگ نیشنل انسٹی ٹیوٹ آف اسپیچ اینڈ ہیرنگ ڈس ایبلٹیز (باندرہ)، محکمہ تعمیرات عامہ (ممبئی)، سدھی ونائک ٹرسٹ اور چیتیہ بھومی کے بانی ممبران سمیت متعدد سرکاری و غیر سرکاری اداروں کے تعاون سے منعقد کی گئی۔