आचारसंहिता भंगाच्या ३७३४ तक्रारी निकाली; ३९८ कोटी ४० लाख रुपयांची मालमत्ता जप्त

मुंबई, दि. ९ : विधानसभा निवडणूक - २०२४ साठी १५ ऑक्टोबर ते ९ नोव्हेंबर २०२४ दरम्यान राज्यभरात सी-व्हिजिल (C-Vigil app) ॲपवर एकूण ३७६४ तक्रारी मिळाल्या. त्यापैकी ३७३४ तक्रारी निवडणूक आयोगाने निकाली काढल्या आहेत, अशी माहिती मुख्य निवडणूक अधिकारी कार्यालयाने दिली.

सी-व्हिजिल ॲप हे नागरिकांना आचारसंहिता भंगाच्या तक्रारी दाखल करण्याची सुविधा देते. हे ॲप कोणत्याही ॲपस्टोअरवरून डाऊनलोड करता येते. तक्रारी प्राप्त झाल्यानंतर संबंधित पथक त्वरित चौकशी करून योग्य कारवाई करते.

३९८ कोटी ४० लाख रुपयांची मालमत्ता जप्त

निवडणुकीदरम्यान, राज्य व केंद्र शासनाच्या अंमलबजावणी यंत्रणांनी बेकायदा पैसे, दारू, अंमली पदार्थ आणि मौल्यवान धातू अशा वस्तू जप्त केल्या आहेत. एकूण ३९८ कोटी ४० लाख रुपयांची मालमत्ता जप्त करण्यात आली आहे.

आचारसंहिता पालनासाठी राज्यभर कठोर कारवाई सुरू असून, यामुळे निवडणुकीत आचारसंहितेचा उल्लंघन होण्याची शक्यता कमी होईल, असे निवडणूक आयोगाने सांगितले.