चार मूलभूत प्रश्न?

31 January 2025

जीवन म्हणजे एक सुंदर प्रवास आहे, एक अविस्मरणीय अनुभव आहे, पण त्याचबरोबर एक मोठी जबाबदारीदेखील आहे. आपण जिथे पाहतो, तिथे आपल्याला जीवनाचे काही ना काही रूप दिसते. कधी ते निसर्गाच्या रूपाने दिसते, कधी माणसाच्या कृतीतून, तर कधी आपल्या विचारांमधून. परंतु या जीवनाचा उपयोग कसा करायचा, हा प्रश्न प्रत्येकासाठी वेगळा असतो.

    "अब्दुल्लाह इब्न मसूद (रजि.) यांनी सांगितले की, आदरणीय मोहम्मद (सलअम) म्हणाले की,

       बंद्याचे पाय प्रलयाच्या दिवशी(मरणोत्तर जीवनात)आपल्या पालनकर्त्यासमोरून हलणार नाहीत जोपर्यंत त्याच्याकडून चार गोष्टींविषयी प्रश्न विचारले जाणार नाहीत:

1. त्याने आयुष्य कशामध्ये घालवले?

2. त्याने तरुणपण कशामध्ये संपवले?

3. त्याने संपत्ती कुठून मिळवली आणि कशावर खर्च केली?

4. त्याने जे ज्ञान मिळवले त्याचा कसा उपयोग केला?"_

     हे चार प्रश्न म्हणजे जीवनाचा पाया आहेत. आपण हे प्रश्न आपल्या रोजच्या जीवनात समजून घेतले, तरच आपले इहलोकातील व परलोकातील आयुष्य अर्थपूर्ण आणि यशस्वी होईल.

     मित्र हो,

       जीवन म्हणजे वितळणारी बर्फ. बर्फाचा थंडावा जितका मोहक असतो, तितकाच तो नाजूक असतो. जर बर्फाचा योग्य उपयोग केला, तर तो आनंद देतो, पण जर दुर्लक्ष केले, तर हळूहळू वितळतो आणि नष्ट होतो.

आपले जीवनही तसेच आहे. वेळेचा आदर केला, त्याचा उपयोग योग्य मार्गासाठी केला, तर जीवन फुलते. पण जर त्याकडे दुर्लक्ष केले, तर ती संपत्ती वाया जाते. हा बर्फ जेव्हा वितळतो, तेव्हा आपल्याला जाणवते की आपण किती मोठा खजिना गमावला आहे.

     आयुष्य हे फक्त कालचक्र नाही, तर एक परीक्षा आहे. आपले प्रत्येक दिवस, प्रत्येक क्षण आपल्याला विचारतो की आपण आपले आयुष्य कुठे आणि कसे खर्च करत आहोत.

      एका बागेचे उदाहरण घ्या. जर बागेची योग्य निगा राखली, तिच्या झाडांना पाणी दिले, तिला खत घातले, तर ती बाग फुलते आणि सुगंधाने भरून जाते. पण जर तीच बाग दुर्लक्षित केली, तर ती कोमेजून सुकून जाते. जीवन ही अशीच एक बाग आहे, जी फुलवणे किंवा वाया घालवणे, हे आपल्या हाती आहे.

     तरुणपण म्हणजे जीवनाचा सर्वात तेजस्वी काळ. या काळात माणूस स्वप्न पाहतो, मोठ्या गोष्टी साध्य करू शकतो, आणि स्वतःचे भविष्य घडवू शकतो.

     परंतु तरुणपणाचा उपयोग कसा होतो, यावर संपूर्ण आयुष्याचा पाया ठरतो. एका मातीच्या दिव्याचा विचार करा. जर त्यामध्ये योग्य प्रकारे तेल घातले आणि त्याला जळू दिले, तर तो दिवा प्रकाश देतो. पण जर त्याला तेल नसेल, तर तो फक्त मातीचा तुकडाच राहतो. तरुणपण हेच आपले सर्वात मोठे तेल आहे, ज्याचा योग्य उपयोग केला पाहिजे.

      संपत्ती ही एक अशी वस्तू आहे, जी माणसाला मोठेपणा देऊ शकते, किंवा त्याला त्याच्या पतनाला घेऊन जाऊ शकते. ती कशी मिळवली आणि कशासाठी वापरली, हेच तिचे खरे महत्त्व ठरवते.

     संपत्ती म्हणजे एक वाहणारी नदी आहे. जर ती योग्य मार्गाने वळवली गेली, तर ती जमिनीला सुपीक करते. पण जर तिला अनियंत्रित सोडले, तर ती पूर आणून नाश घडवते. म्हणूनच संपत्तीचा उपयोग गरजवंतांसाठी, चांगल्या कामांसाठी करावा. त्याचबरोबर ती कशी मिळवली, हेही तितकेच महत्त्वाचे आहे.

     ज्ञान हे जीवनाचे दीप आहे. ते अज्ञानाच्या अंधाराला दूर करते. परंतु हे ज्ञान फक्त वाचण्यात किंवा शिकण्यात मर्यादित राहिले, तर ते निरुपयोगी ठरते.एक दीपक तेव्हाच उपयुक्त ठरतो, जेव्हा तो जळतो आणि प्रकाश देतो. तसंच, ज्ञानही तेव्हाच उपयुक्त ठरते, जेव्हा त्याचा उपयोग समाजासाठी, दुसऱ्यांच्या भल्यासाठी केला जातो. ज्ञान ही ताकद आहे, पण ही ताकद सत्कर्मासाठी वापरण्यातच खरी आहे.

     जीवन एक कोरी पाटी आहे. आपण त्यावर चांगल्या गोष्टी लिहू शकतो, किंवा वाईट विचारांचे डाग लावू शकतो.

     सकारात्मकता म्हणजे जीवनाचा आदर करणे, वेळेचा योग्य उपयोग करणे, आणि आपल्या कर्मांमधून चांगले आदर्श निर्माण करणे. दुसरीकडे, नकारात्मकता म्हणजे आयुष्य वाया घालवणे, चुकीच्या मार्गावर चालणे, आणि इतरांनाही त्या वाटेवर नेणे.

     जीवन म्हणजे अल्लाहने दिलेले एक वरदान आहे. एक अमूल्य संधी आहे.एक परीक्षा आहे, वितळणाऱ्या बर्फासारखे आहे, जे काळाच्या ओघात संपत जाते. त्याचा आदर करणे, त्याचा उपयोग चांगल्या कामांसाठी करणे, हेच आपले उद्दिष्ट असायला हवे.

  मित्रांनो,

     आपले जीवन फुलवा, त्याचा योग्य मार्ग निवडा, आणि आपल्या कृतींनी इतरांसाठी प्रेरणा बना. जे आपल्या आयुष्याचा योग्य उपयोग करतात, तेच खऱ्या अर्थाने जीवन जगतात. प्रलयाच्या दिवशी(मरणोत्तर जीवन) यशस्वी होणारे तेच असतील, ज्यांनी जीवनाचे हे अमूल्य धन अंतिम प्रेषित आदरणीय मोहम्मद (सलअम) यांनी दाखवलेल्या मार्गाने खर्च केले असेल.

आसीफ खान

धामणगाव बढे

जिल्हा: बुलढाणा

9405932295