मोबाईल फोनवर समन्स पाठवणे पोलिसांना महागात, न्यायालयाने ५ हजार रुपयांचा दंड ठोठावला
21 January 2026
मुंबई (मिम टाइम्स) नागपूर येथील एका विशेष न्यायालयाने कायदेशीर प्रक्रिया न पाळता मोबाईल फोनद्वारे साक्षीदारांना समन्स पाठवण्याच्या पोलिसांच्या कृतीवर तीव्र नाराजी व्यक्त केली आहे. न्यायालयाने हा प्रकार बेकायदेशीर ठरवत संबंधित पोलिस कर्मचाऱ्यावर ५ हजार रुपयांचा दंड ठोठावण्याचे आदेश दिले आहेत.
अतिरिक्त सत्र न्यायाधीश अजय ए. कुलकर्णी यांच्या न्यायालयात सुरू असलेल्या एका प्रकरणाच्या सुनावणीदरम्यान पोलिसांनी गंजाल प्रभाकर खरबे आणि दिनेश्वर सीताराम मुंडे या साक्षीदारांना अधिकृत समन्स न देता मोबाईल फोनद्वारेच हजर राहण्याची सूचना दिल्याचे समोर आले. या अनौपचारिक पद्धतीमुळे साक्षीदार न्यायालयात गैरहजर राहिले, परिणामी प्रकरणाच्या सुनावणीत विलंब झाला आणि मौल्यवान न्यायालयीन वेळ वाया गेला.
न्यायालयाने आपल्या आदेशात स्पष्ट केले की मोबाईल फोनद्वारे समन्स पाठवणे ही कायद्याने मान्य केलेली प्रक्रिया नाही. अशा निष्काळजीपणामुळे न्यायप्रक्रियेला बाधा निर्माण होते, असे नमूद करत न्यायालयाने लकडगंज पोलीस ठाण्याच्या वरिष्ठ निरीक्षकांना संबंधित पोलिस कर्मचाऱ्याकडून ५ हजार रुपयांचा दंड वसूल करून पुढील सुनावणीपर्यंत न्यायालयात जमा करण्याचे निर्देश दिले आहेत.
तसेच भविष्यात सर्व प्रकरणांमध्ये समन्सची अंमलबजावणी केवळ कायदेशीर मार्गानेच करावी आणि त्याचा अहवाल सादर करावा, असे आदेश पोलिसांना देण्यात आले आहेत. या आदेशाची प्रत नागपूरचे पोलीस आयुक्त यांनाही पाठवण्यात आली असून आवश्यक प्रशासकीय कारवाई करण्याचे निर्देश देण्यात आले आहेत.
या निर्णयामुळे न्यायालयीन कामकाजात कोणतीही हलगर्जी, निष्काळजीपणा किंवा बेकायदेशीर पद्धत सहन केली जाणार नाही, असा स्पष्ट संदेश देण्यात आला आहे.
