آل انڈیا نو سینک کیمپ کا آئی این ایس شیواجی، لوناؤلا میں کامیاب اختتام، مہاراشٹر کی کیڈٹ تیّا آوالے بہترین گرل کیڈٹ اور آسام کے راجویر سنگھ بہترین بوائے کیڈٹ قرار

13 July 2026

لوناؤلا (م ٹائمز )

نیشنل کیڈٹ کور (این سی سی) کے نیول ونگ کا سالانہ اور ملک کا سب سے اہم تربیتی کیمپ آل انڈیا نو سینک کیمپ (AINSC) 2026 آئی این ایس شیواجی، لوناؤلا میں کامیابی کے ساتھ اختتام پذیر ہوگیا۔ اس کیمپ کا انعقاد این سی سی مہاراشٹر ڈائریکٹوریٹ نے ہیڈکوارٹرز ڈائریکٹوریٹ جنرل این سی سی کی جانب سے کیا، جس میں ملک بھر کے 17 این سی سی ڈائریکٹوریٹس سے منتخب 612 نیول ونگ کیڈٹس، جن میں 204 طالبات بھی شامل تھیں، نے شرکت کی۔

اختتامی تقریب کا معائنہ میجر جنرل وویک تیاگی، ایڈیشنل ڈائریکٹر جنرل، این سی سی مہاراشٹر ڈائریکٹوریٹ نے کیا۔ اس موقع پر کموڈور ایس پارتھیبن، کمانڈنگ آفیسر آئی این ایس شیواجی سمیت این سی سی مہاراشٹر ڈائریکٹوریٹ اور آئی این ایس شیواجی کے سینئر افسران بھی موجود تھے۔

کیمپ میں مختلف مقابلوں میں شاندار کارکردگی کا مظاہرہ کرتے ہوئے مدھیہ پردیش و چھتیس گڑھ ڈائریکٹوریٹ نے مجموعی چیمپئن شپ ٹرافی اپنے نام کی۔ مہاراشٹر ڈائریکٹوریٹ کی کیڈٹ تیّا راجیش آوالے کو بہترین گرل کیڈٹ جبکہ آسام ڈائریکٹوریٹ کے کیڈٹ سودھا راجویر سنگھ کو بہترین بوائے کیڈٹ کا اعزاز دیا گیا۔

کیمپ کے دوران لیفٹیننٹ جنرل وریندر وتس نے بھی کیڈٹس سے ملاقات کی۔ انہوں نے نوجوانوں کی نظم و ضبط، جوش و جذبے اور عزم کو سراہتے ہوئے انہیں زندگی کے ہر شعبے میں بہترین کارکردگی دکھانے کی ترغیب دی۔ اپنے خطاب میں انہوں نے فوجی خدمات کے تجربات بھی شیئر کیے اور قیادت، دیانت داری، ثابت قدمی اور بے لوث خدمت جیسے اوصاف اپنانے پر زور دیا۔

کیمپ کے دوران بوٹ پلنگ، ڈرل، سیمیفور (بصری سگنلنگ)، فائرنگ اور شپ ماڈلنگ جیسے سخت مقابلے منعقد کیے گئے، جن میں کیڈٹس نے مہارت، پیشہ ورانہ صلاحیت اور ٹیم ورک کا شاندار مظاہرہ کیا۔ اس کے علاوہ انہیں ڈرون آپریشن، سائبر سکیورٹی، بحری جہاز رانی، آگ بجھانے، ڈیمیج کنٹرول، سمندر میں بقا، مواصلاتی نظام، بحری قیادت اور سی مین شپ جیسے اہم موضوعات پر بھی عملی تربیت فراہم کی گئی۔

این سی سی کے مطابق، آل انڈیا نو سینک کیمپ 2026 کا کامیاب انعقاد اس عزم کی عکاسی کرتا ہے کہ نوجوانوں میں نظم و ضبط، قائدانہ صلاحیت، بحری شعور، قومی یکجہتی اور خدمتِ وطن کے جذبے کو مزید فروغ دیا جائے تاکہ مستقبل کے ذمہ دار اور باصلاحیت رہنما تیار کیے جا سکیں۔