عدالتی اپیلوں کے سبب متاثر میونسپل کونسلوں اور نگر پنچایتوں کیلئے ترمیم شدہ انتخابی پروگرام جاری
- MimTimes मिम टाइम्स م ٹائمز
- 19 minutes ago
- 2 min read
30 November 2025
ممبئی (م ٹائمز ) ریاستی الیکشن کمیشن نے ان میونسپل کونسلوں اور نگر پنچایتوں کے لئے، جہاں نامزدگیوں کی جانچ کے بعد امیدواروں نے انتخابی افسران کے فیصلوں کے خلاف ضلع عدالت میں اپیلیں دائر کی تھیں اور جن اپیلوں کے فیصلے 22 نومبر 2025 تک آنا ضروری تھے لیکن 23 نومبر یا اس کے بعد سنائے گئے، ترمیم شدہ انتخابی پروگرام 2025 جاری کردیا ہے۔ یہ حکم کمشنر کے سکریٹری سریش کاکانی کے دستخط سے 29 نومبر 2025 کو جاری کیا گیا۔
pdf file
انتخابی کمیشن کے مطابق بعض معاملات میں ایسا بھی ہوا کہ اپیل کا فیصلہ تاخیر سے آنے کے باوجود انتخابی افسران کو عدالت کے تحریری حکم نامے کا انتظار کیے بغیر ہی کارروائی کرنی پڑی، اور امیدواروں کو نامزدگی واپس لینے کے لئے لازمی مدت دیئے بغیر انتخابی نشان تقسیم کردیئے گئے۔ اس وجہ سے 26 نومبر 2025 یا اس کے بعد کی گئی نشان تقسیم کی کارروائی قواعد کے خلاف شمار ہوتی ہے۔ اسی بنا پر متعلقہ نشستوں کے لئے جاری انتخابی عمل کو فوری طور پر روک کر اب ان مراحل سے آگے کی کارروائی نئے شیڈول کے مطابق کی جائے گی جہاں تک مراحل باضابطہ طور پر مکمل ہو چکے ہیں۔
نئے پروگرام کے تحت ضلع کلکٹر 4 دسمبر 2025 کو انتخابی شیڈول جاری کریں گے۔ نامزدگی واپس لینے کی آخری تاریخ 10 دسمبر دوپہر تین بجے تک ہوگی جبکہ 11 دسمبر کو ضرورت کے مطابق انتخابی نشان الاٹ کیے جائیں گے اور حتمی امیدواروں کی فہرست شائع کی جائے گی۔ اگر ضرورت پڑے تو ووٹنگ 20 دسمبر 2025 کو صبح 7 بج کر 30 منٹ سے شام 5 بج کر 30 منٹ تک منعقد ہوگی۔ ووٹوں کی گنتی اور نتائج کا اعلان 21 دسمبر کی صبح 10 بجے سے کیا جائے گا اور سرکاری گزٹ میں نتائج 23 دسمبر 2025 سے پہلے شائع کرنا لازم ہوگا۔
انتخابی ضابطۂ اخلاق شیڈول جاری ہونے کے ساتھ ہی نافذ العمل ہوگا اور نتائج کے اعلان تک برقرار رہے گا۔ رکن کے عہدے کے لئے ہونے والے انتخاب میں ضابطہ اخلاق صرف متعلقہ وارڈ تک محدود رہے گا جبکہ صدر کے انتخاب کی صورت میں پوری میونسپل کونسل یا نگر پنچایت کے دائرے میں نافذ رہے گا۔ ضابطے کے تحت کسی بھی وزیر، رکن پارلیمان، رکن اسمبلی، کارپوریٹر یا دیگر عہدیدار کو متعلقہ علاقے کے ووٹروں کو براہِ راست یا بالواسطہ طور پر کوئی لالچ، اعلان یا رعایت دینے کی اجازت نہیں ہوگی، خواہ یہ کارروائی کسی دوسرے مقام پر ہی کیوں نہ کی جائے۔ کمیشن نے ہدایت جاری کی ہے کہ جن نشستوں پر اپیلیں دائر تھیں اور جن کے فیصلے 23 نومبر یا اس کے بعد سنائے گئے، ان نشستوں کے انتخابات سابقہ 4 نومبر کے پروگرام کے مطابق نہ کرائے جائیں۔ اگر ایسی کسی صورت میں صدر کے عہدے کا بھی تنازع شامل ہو، تو پوری میونسپل کونسل کا انتخاب فی الحال مؤخر کر دیا گیا ہے۔ ان تمام مؤخر شدہ نشستوں اور عہدوں کی تفصیلات جمع کرکے ضلع کلکٹر کو ہدایت دی گئی ہے کہ وہ پیوستہ ضمیمہ نمبر 1 میں درج اوقات اور مراحل کے مطابق ترمیم شدہ انتخابی پروگرام نافذ کریں۔
