مہاراشٹر ریاستی الیکشن کمیشن کا نیا سرکیولر جاری، ضلع پریشد اور پنچایت سمیتی انتخابات کے لیے ووٹر لسٹ کی تیاری کا نیا پروگرام، حتمی فہرست کی تاریخ میں توسیع
- MimTimes मिम टाइम्स م ٹائمز
- Oct 28
- 2 min read
28 October 2025
ممبئی، مہاراشٹر ریاستی الیکشن کمیشن نے ضلع پریشد اور پنچایت سمیتیوں کے عام انتخابات کے لیے ووٹر لسٹ تیار کرنے سے متعلق ایک اہم سرکیولر جاری کیا ہے۔ یہ سرکیولر تمام ضلع کلکٹروں کو بھیجا گیا ہے، تاہم ممبئی شہر، ممبئی مضافات، بھنڈارا اور گوندیا اضلاع کو اس سے مستثنیٰ رکھا گیا ہے۔
سرکیولر کے مطابق، سپریم کورٹ کے حکم اور کمیشن کے سابقہ ہدایات کی روشنی میں عام انتخابات کے لیے ووٹر لسٹ تیار کرنے کا نیا پروگرام طے کیا گیا ہے۔ کمیشن نے ووٹر لسٹ کی اشاعت کی آخری تاریخ، جو پہلے ۲۷ اکتوبر ۲۰۲۵ مقرر تھی، میں توسیع کا اعلان کیا ہے۔ اس کے ساتھ ہی ووٹر لسٹ کی تیاری کے مختلف مراحل میں بھی کچھ تبدیلیاں کی گئی ہیں۔
اب الیکشن ڈیپارٹمنٹ اور الیکشن بلاک کی چھپی ہوئی ووٹر لسٹوں کو باضابطہ طور پر منظوری دینے کی تاریخ ۳ نومبر ۲۰۲۵ مقرر کی گئی ہے۔ اسی روز یہ اعلان بھی کیا جائے گا کہ ووٹر لسٹیں عوامی معلومات کے لیے دستیاب کرائی گئی ہیں۔ اس کے بعد ۱۲ دسمبر ۲۰۲۵ کو ووٹنگ مراکز کی فہرست کے ساتھ مرکزوار ووٹر لسٹ جاری کی جائے گی۔
الیکشن کمیشن نے ایک علیحدہ ہدایت نامے میں ووٹر لسٹ میں شامل دوہرے یا شکایتیں والے ناموں کے حوالے سے خصوصی کارروائی کی ہدایت بھی دی ہے۔ کمیشن نے متعلقہ افسران کو حکم دیا ہے کہ ایسے معاملات کو ترجیحی بنیاد پر نمٹایا جائے تاکہ ووٹر لسٹ مکمل طور پر درست اور صاف شفاف ہو۔
یہ سارا عمل ریاستی الیکشن کمشنر کے احکامات کے تحت انجام دیا جا رہا ہے اور سرکیولر پر ریاستی الیکشن کمیشن کے نائب سکریٹری کے۔ سوریہ کرشنامورتی کے دستخط ہیں۔
ریاستی الیکشن کمیشن کے اس نئے سرکیولر کے بعد ضلع پریشد اور پنچایت سمیتی انتخابات کی تیاریاں آخری مرحلے میں داخل ہو گئی ہیں، اور انتظامیہ ووٹر لسٹوں کی تیاری کے کام کو مقررہ وقت پر مکمل کرنے کے لیے پوری طرح سرگرم ہو گیا ہے۔
