مہاراشٹر میں 24 گھنٹے دکانیں ہوٹل کھلے رکھنے کی اجازت شراب فروشوں پر پابندی قائم ،مہاراشٹر حکومت کا بڑا فیصلہ
- MimTimes मिम टाइम्स م ٹائمز
- Oct 2
- 1 min read
02 October 2025
ممبئی، مہاراشٹر حکومت نے واضح کیا ہے کہ مہاراشٹر دکانیں و آستھاپنا (نوکری و سروس شرائط کے ضابطہ بندی) ایکٹ 2017 کے تحت اب ریاست میں شراب فروخت یا شراب فراہم کرنے والے اداروں کو چھوڑ کر تمام دکانیں، ہوٹل، ریستوران، فوڈ ہاؤس، تھیٹر، عوامی تفریح گاہیں اور دیگر آستھاپنا 24 گھنٹے کھلی رکھی جا سکتی ہیں۔
حکومت نے کہا ہے کہ مذکورہ ایکٹ کی دفعہ 16 (1) (خ) کے مطابق کسی بھی آستھاپنا کو ہفتے کے تمام دن کاروبار کے لئے کھلا رکھنے کی اجازت ہے، تاہم ہر ملازم کو ہفتے میں ایک دن 24 گھنٹے مسلسل آرام دینا لازمی ہوگا۔ "دن" کی تعریف بھی ایکٹ کے تحت آدھی رات سے شروع ہونے والے 24 گھنٹوں پر مشتمل ہے۔
البتہ 19 دسمبر 2017 کی سرکاری نوٹیفکیشن کے مطابق ریاست میں شراب فروش ادارے، پرمٹ روم، بیئر بار، ڈانس بار، ہُکّہ پارلر، ڈسکوتھیک اور اس نوعیت کے دیگر ادارے، جہاں شراب کی فروخت یا فراہمی ہوتی ہے، ان کے کھلنے اور بند ہونے کے اوقات حکومت نے پہلے ہی مقرر کر رکھے ہیں۔ لہٰذا ایسے ادارے 24 گھنٹے کھلے نہیں رہ سکتے۔
حکومت کو حالیہ دنوں میں عوامی نمائندوں اور شہریوں کی جانب سے یہ شکایات موصول ہو رہی تھیں کہ مقامی انتظامیہ اور پولیس کی جانب سے عام دکانوں اور آستھاپنا کو رات بھر کھلا رکھنے پر پابندی لگائی جا رہی ہے، جبکہ قانون میں ایسی کوئی روک نہیں ہے۔ ان شکایات کا نوٹس لیتے ہوئے حکومت نے یہ وضاحت جاری کی ہے۔
یہ سرکاری فیصلہ مہاراشٹر حکومت کی ویب سائٹ www.maharashtra.gov.in پر جاری کیا گیا ہے۔
