میئر کے عہدوں کی قرعہ اندازی مکمل، مہاراشٹر کی بلدیاتی سیاست میں نئی ہلچل، ممبئی سمیت 29 میونسپل کارپوریشنوں میں میئر کے پہلے ڈھائی سالہ دور کے لیے ریزرویشن طے، خواتین کو 50 فیصد نمائندگی
- MimTimes मिम टाइम्स م ٹائمز
- Jan 22
- 3 min read
22 January 2026
ممبئی (م ٹائمز )
مہاراشٹر کی بلدیاتی سیاست میں ایک اہم مرحلہ طے ہو گیا ہے۔ ریاست کی مختلف میونسپل کارپوریشنوں میں اقتدار کی تشکیل سے قبل میئر کے عہدے کے لیے ریزرویشن کا قرعہ آج بروز جمعرات وزارت میں نکالا گیا۔ یہ قرعہ میئر کے پہلے ڈھائی سالہ دور کے لیے ہے، جس کے بعد بلدیاتی سطح پر سیاسی سرگرمیوں میں نمایاں تیزی آ گئی ہے۔
ممبئی کے میئر کا عہدہ ہمیشہ سے سیاسی وقار کی علامت سمجھا جاتا رہا ہے، اسی لیے اس قرعہ اندازی پر سب کی نظریں مرکوز تھیں۔ 15 جنوری کو ریاست کی 29 میونسپل کارپوریشنوں کے لیے ووٹنگ ہوئی تھی اور اگلے ہی دن نتائج سامنے آ گئے تھے۔ اس کے بعد ممبئی، کلیان-ڈومبیولی اور الہاس نگر میں میئر کے انتخاب کو لے کر بھارتیہ جنتا پارٹی اور شیوسینا کے درمیان کشمکش شروع ہو گئی تھی، جبکہ بھیونڈی اور چندرپور میں کانگریس اور شیوسینا (ادھو) کے درمیان مقابلہ دیکھنے میں آیا۔
میئر کے عہدے کے ریزرویشن کا یہ قرعہ شہری ترقیات کے محکمے کی ریاستی وزیر مادھوری مسال کی صدارت میں وزارت کے کانفرنس ہال میں صبح 12 بجے نکالا گیا۔ اس عمل کے ذریعے یہ واضح ہو گیا کہ کن میونسپل کارپوریشنوں میں میئر کا عہدہ کس زمرے کے لیے مخصوص ہوگا اور کہاں کھلے زمرے میں انتخاب ممکن ہوگا۔
محکمے کے مطابق ریزرویشن چکر وار طریقے سے طے کیا گیا ہے اور اس کے لیے 2011 کی مردم شماری کو بنیاد بنایا گیا۔ سب سے پہلے درج فہرست ذات اور درج فہرست قبائل کے لیے قرعہ اندازی کی گئی، اس کے بعد پسماندہ طبقات کے لیے نشستیں مقرر ہوئیں۔ مجموعی طور پر میئر کے عہدوں میں خواتین کے لیے 50 فیصد ریزرویشن رکھا گیا ہے۔
کل تقسیم کچھ اس طرح رہی:
درج فہرست ذات 3، درج فہرست قبائل 1، پسماندہ طبقات 8 اور کھلا زمرہ 17۔
• ممبئی: کھلا زمرہ، خواتین کے لیے مخصوص
• نوی ممبئی: کھلا زمرہ، خواتین کے لیے مخصوص
• تھانے: درج فہرست ذات
• میرا-بھائندر: کھلا زمرہ، خواتین کے لیے مخصوص
• کلیان-ڈومبیولی: درج فہرست قبائل
• الہاس نگر: پسماندہ طبقات
• وسئی-ویرار: کھلا زمرہ
• بھیونڈی-نظام پور: کھلا زمرہ، خواتین کے لیے مخصوص
• پنویل: پسماندہ طبقات
• ناسک: کھلا زمرہ، خواتین کے لیے مخصوص
• اہلیانگر: پسماندہ طبقات، خواتین کے لیے مخصوص
• مالیگاؤں: کھلا زمرہ، خواتین کے لیے مخصوص
• جلگاؤں: پسماندہ طبقات، خواتین کے لیے مخصوص
• دھولیہ: کھلا زمرہ، خواتین کے لیے مخصوص
• ناگپور: کھلا زمرہ
• اکولا: پسماندہ طبقات، خواتین کے لیے مخصوص
• امراوتی: کھلا زمرہ
• چندرپور: پسماندہ طبقات، خواتین کے لیے مخصوص
• پونے: کھلا زمرہ، خواتین کے لیے مخصوص
• پمپری-چنچوڑ: کھلا زمرہ، خواتین کے لیے مخصوص
• سانگلی: کھلا زمرہ
• کولہاپور: پسماندہ طبقات
• اچلکرنجی: پسماندہ طبقات
• سولاپور: کھلا زمرہ
• چھترپتی سمبھاجی نگر: کھلا زمرہ
• پربھنی: کھلا زمرہ
• جالنہ: درج فہرست ذات، خواتین کے لیے مخصوص
• لاتور: درج فہرست ذات، خواتین کے لیے مخصوص
• ناندیڑ: کھلا زمرہ، خواتین کے لیے مخصوص
قرعہ اندازی کے نتائج سامنے آنے کے بعد اب سب کی نظریں اس بات پر مرکوز ہیں کہ مختلف میونسپل کارپوریشنوں میں میئر کے عہدے پر آخر کس سیاسی جماعت اور کس شخصیت کو موقع ملتا ہے۔ بلدیاتی سیاست میں آئندہ چند دن نہایت اہم سمجھے جا رہے ہیں۔
