EVM हटावच्या मागणीसाठी भीम आर्मीचे दादर येथे आंदोलन
- MimTimes मिम टाइम्स م ٹائمز
- Dec 1, 2024
- 1 min read
1 December 2024
मुंबई: विधानसभा निवडणुकीनंतर राज्यातील विविध पक्ष आणि सामाजिक संघटनांचा ईव्हीएम विरोधातील रोष दिवसेंदिवस वाढत चालला आहे. पुण्यात ज्येष्ठ सामाजिक कार्यकर्ते बाबा आढाव यांनी ईव्हीएम विरोधात आंदोलन सुरू केल्यानंतर भीम आर्मी भारत एकता मिशनने मुंबईच्या दादर येथे जोरदार आंदोलन केले आणि स्वाक्षरी मोहीम राबवली.
दादर पूर्व रेल्वे स्थानकाजवळ भीम आर्मीचे मुंबई अध्यक्ष अविनाश गरुड यांच्या नेतृत्वाखाली कार्यकर्त्यांनी "ईव्हीएम हटाव, देश बचाव", "बॅलेट पेपरवर निवडणुका घ्या" अशा घोषणांनी परिसर दणाणून सोडला. आंदोलनादरम्यान, "ईव्हीएम नको, बॅलेट पेपर हवा" या टॅगलाइनखाली मोठा बॅनर लावून स्वाक्षरी मोहीम राबवण्यात आली. या मोहिमेला नागरिकांनी उत्स्फूर्त प्रतिसाद देत आपली सह्या नोंदवून पाठिंबा दर्शवला.
सदर आंदोलनात भीम आर्मीचे राष्ट्रीय महासचिव अशोक कांबळे, माजी राज्य कार्याध्यक्ष सुनील गायकवाड, मुंबई प्रदेश पदाधिकारी दिनेश शर्मा, विजय कांबळे, अविनाश समंदर, राजकुमार साळे, सुरेश धाडी, प्रकाश पाईकराव, तुषार कदम, समीर जाधव, भास्कर गायकवाड यांच्यासह मोठ्या प्रमाणावर कार्यकर्त्यांनी सहभाग घेतला.
आंदोलनादरम्यान पोलिसांनी आंदोलकांना ताब्यात घेतले. आंदोलन अधिक तीव्र करण्याचा इशारा यावेळी अशोक कांबळे यांनी दिला आहे.
