بیسٹ بس کے ڈرائیور کی ایک اور لاپرواہی، راہگیر کی موقع پر موت

11, December 2024

ممبئی: آج دوپہر کے وقت ممبئی کے مصروف علاقے والچند ہیراچند مارگ، کمشنر آفس (زون-1) کے قریب ایک المناک حادثہ پیش آیا، جس میں ایک راہگیر بیسٹ بس کے نیچے آکر موقع پر ہی ہلاک ہوگیا۔ حادثہ تقریباً 4:25 بجے پیش آیا، جب بس انوشکتی نگر سے الیکٹرک ہاؤس جا رہی تھی۔حادثے کی تفصیلات:بیسٹ کی بس نمبر 6972 (MH 03 EC 0174)، جو دیونار ڈپو کی ایس ایم ٹی اے ٹی پی ایل بس ہے، اپنے روٹ A-26/Sr.33 پر چل رہی تھی۔ حادثے کے وقت بس کے ڈرائیور دنیان دیو نام دیو جگڈالے (بی ڈی: 007780) اور کنڈکٹر نند کشور شنکر لمبھ کھاڑے (بی سی: 197065) ڈیوٹی پر موجود تھے۔اطلاعات کے مطابق، حادثہ اس وقت پیش آیا جب بس دوپہر تقریباً 3:25 بجے انوشکتی نگر سے روانہ ہو کر 4:25 بجے کمشنر آفس کے قریب پہنچی۔ ایک راہگیر اچانک بس کے سامنے آ گیا اور بس کے پہیوں کے نیچے آکر ہلاک ہو گیا۔جائے وقوع پر کارروائی:حادثے کی اطلاع ملتے ہی بیسٹ انتظامیہ اور مقامی پولیس موقع پر پہنچ گئی۔ فوری طور پر قانونی کارروائی شروع کر دی گئی اور بس ڈرائیور کو تحویل میں لے کر پوچھ گچھ کی جا رہی ہے۔راہگیر کی شناخت تاحال نہیں ہو سکی ہے اور لاش کو پوسٹ مارٹم کے لیے قریبی اسپتال منتقل کر دیا گیا ہے۔عوام میں خوف و ہراس:حادثے کے بعد علاقے میں افرا تفری مچ گئی۔ مقامی لوگوں نے بیسٹ انتظامیہ سے مطالبہ کیا ہے کہ بس ڈرائیورز کی ٹریننگ پر مزید توجہ دی جائے اور سڑکوں پر احتیاط برتی جائے تاکہ اس طرح کے حادثات سے بچا جا سکے۔پولیس حادثے کی تحقیقات کر رہی ہے تاکہ حادثے کی مکمل تفصیلات سامنے آ سکیں۔