سوشل میڈیا پر انتخابی ضابطہ اخلاق کی خلاف ورزی پر گروپ ایڈمن کے خلاف سخت کارروائی کا انتباہ

18November 2024

ستارا , ستارا شہر پولیس اسٹیشن کے سینئر پولیس انسپکٹر راجندر مسکے نے واٹس ایپ گروپ ایڈمن کو ایک سخت نوٹس جاری کی ہے۔ اس نوٹس میں کہا گیا ہے کہ گروپ ایڈمن اپنے گروپ میں شامل افراد اور ان کی جانب سے شیئر کیے جانے والے مواد کے ذمہ دار ہیں۔ 

نوٹس کے مطابق، اسمبلی انتخابات 2024 کے تحت 18 نومبر 2024 کی شام 5 بجے انتخابی مہم کا وقت ختم ہو گیا ہے۔ اس کے بعد انتخابی حلقوں میں کسی بھی امیدوار یا ان کے کارکنان کی جانب سے سوشل میڈیا پلیٹ فارم جیسے فیس بک، یوٹیوب، واٹس ایپ، انسٹاگرام وغیرہ پر تشہیری مواد شیئر کرنا ممنوع ہوگا۔ 

گروپ ایڈمن کو ہدایت دی گئی ہے کہ وہ اپنے گروپ کی سیٹنگز کو "صرف ایڈمن کے لیے" (Only for Admin) تبدیل کریں تاکہ مہم ختم ہونے کے بعد کوئی بھی ممبر کسی قسم کا تشہیری مواد شیئر نہ کر سکے۔ اگر کسی گروپ میں انتخابی مہم سے متعلق کوئی مواد شیئر کیا جاتا ہے تو اس کے ایڈمن کو مکمل طور پر ذمہ دار ٹھہرایا جائے گا اور ان کے خلاف قانونی کارروائی کی جائے گی۔ 

پولیس نے واضح کیا ہے کہ ضابطہ اخلاق کی خلاف ورزی یا قانون و امن و امان میں خلل ڈالنے کی صورت میں ایڈمن کے خلاف موجودہ قوانین کے تحت مقدمہ درج کیا جائے گا اور نوٹس کو عدالت میں ثبوت کے طور پر پیش کیا جائے گا۔ 

یہ نوٹس سینئر پولیس انسپکٹر راجندر مسکے کے دستخط اور مہروں کے ساتھ جاری کی گئی ہے۔ عوام سے اپیل کی گئی ہے کہ وہ انتخابی ضابطہ اخلاق کی پابندی کریں اور امن و امان قائم رکھنے میں تعاون کریں۔