قومی'ٹیلنٹ ہنٹ' پروگرام کے لیے زونل کوآرڈینیٹرز کی تقرری تنظیمی سطح پر نئے خیالات اور صلاحیتوں کو سامنے لانے کا موقع فراہم

12 October 2025

نئی دہلی، آل انڈیا کانگریس کمیٹی (اے آئی سی سی) نے اپنے جاری قومی ٹیلنٹ ہنٹ پروگرام کے تحت ملک بھر میں زونل ڈھانچے اور اہم تقرریوں کا اعلان کیا ہے۔ اس پروگرام کا مقصد پارٹی کے اندر نئی نسل کے باصلاحیت اور متحرک افراد کی شناخت کر کے انہیں ترجمان، پینلسٹ، ریسرچ کوآرڈینیٹر اور پبلسٹی کوآرڈینیٹر جیسے ذمہ دار عہدوں کے لیے تیار کرنا ہے۔

کانگریس ورکنگ کمیٹی کے رکن اور پارٹی کے میڈیا و پبلسٹی ڈیپارٹمنٹ کے چیئرمین پون کھیڑا کی جانب سے جاری کردہ ایک سرکلر میں ملک کو چھ زونز میں تقسیم کرنے کی تفصیلات بیان کی گئی ہیں۔ ہر زون کی نگرانی ایک زونل کوآرڈینیٹر اور ایک شریک کوآرڈینیٹر کریں گے۔ ان تقرریوں کا مقصد یہ یقینی بنانا ہے کہ ٹیلنٹ ہنٹ کا عمل تمام ریاستوں اور مرکزی علاقوں میں پردیش کانگریس کمیٹیوں (پی سی سیز) کے ساتھ قریبی ہم آہنگی کے ذریعے شفاف اور منظم انداز میں مکمل کیا جائے۔

مرکزی زون کی ذمہ داری سپتگیری الاکا کو دی گئی ہے، جن کے ساتھ انیل یادو شریک کوآرڈینیٹر ہوں گے۔ اس زون میں مدھیہ پردیش، اتر پردیش اور چھتیس گڑھ شامل ہیں۔ مشرقی زون کی قیادت اتل لوندھے کریں گے جبکہ مہما سنگھ ان کے شریک کوآرڈینیٹر ہوں گے۔ اس زون میں مغربی بنگال، بہار، جھارکھنڈ اور اوڈیشہ شامل ہیں۔

شمالی زون کے زونل کوآرڈینیٹر جگنیش میوانی ہوں گے، جبکہ چرن سپرا شریک کوآرڈینیٹر کی حیثیت سے کام کریں گے۔ ان کے دائرہ کار میں چندی گڑھ، ہریانہ، ہماچل پردیش، جموں و کشمیر، لداخ، دہلی، پنجاب اور اتراکھنڈ شامل ہیں۔ شمال مشرقی زون کی نگرانی راگنی نائک کریں گی اور میتھیو انٹونی ان کے شریک کوآرڈینیٹر ہوں گے۔ اس زون میں اروناچل پردیش، آسام، منی پور، میگھالیہ، میزورم، ناگالینڈ، سکم اور تریپورہ شامل ہیں۔

جنوبی زون کے لیے سلمان سوز کو زونل کوآرڈینیٹر اور سارل پٹیل کو شریک کوآرڈینیٹر مقرر کیا گیا ہے۔ اس زون میں انڈمان و نکوبار، آندھرا پردیش، کیرالہ، لکشدیپ، پڈوچیری، تمل ناڈو، تلنگانہ اور کرناٹک شامل ہیں۔ مغربی زون کی قیادت سپریہ شرینیت کے سپرد کی گئی ہے، جبکہ سادھنا بھارتی ان کی شریک کوآرڈینیٹر ہوں گی۔ اس زون کے تحت دادرہ و نگر حویلی، دمن و دیو، گوا، گجرات، مہاراشٹر اور راجستھان شامل ہیں۔

کانگریس پارٹی کا کہنا ہے کہ قومی ٹیلنٹ ہنٹ پروگرام کے ذریعے تنظیمی سطح پر نئے خیالات اور صلاحیتوں کو سامنے لانے کا موقع فراہم کیا جائے گا، تاکہ پارٹی کے کمیونیکیشن ونگ کو مزید مؤثر، مضبوط اور جدید خطوط پر استوار کیا جا سکے۔ یہ اقدام کانگریس کی اس کوشش کی عکاسی کرتا ہے کہ وہ بدلتے ہوئے سیاسی اور سماجی حالات میں اپنی ابلاغی حکمتِ عملی کو بہتر بنا کر عوام سے مضبوط تعلق قائم کرے۔

#Congress #TalentHunt #AICC #PawanKhera #CongressWorkingCommittee #SalmanSoz #SupriyaShrinate #JigneshMevani #RaginiNayak #AtulLondhe #IndianPolitics #IndianNationalCongress #PoliticsNews #DelhiNews #CongressUpdates