لاڈلی بہن‘ اسکیم کے اشتہار پر 200 کروڑ روپے خرچ،عوام کے پیسے سیاست چمکانے کے لئے استعمال ہو رہے ہیں

ممبئی 17 اکتوبر ، مہاراشٹر میں بی جے پی کی قیادت میں مہایوتی حکومت کی جانب سے لاڈلی بہین اسکیم کے اشتہارات پر 200 کروڑ روپے خرچ کیے جانے پر ریاستی کانگریس کے چیف ترجمان اتل لونڈھے نے سخت تنقید کی ہے۔ انہوں نے الزام لگایا کہ حکومت عوام کے پیسے کو اشتہارات اور تقریبات پر ضائع کر رہی ہے، جو صرف سیاسی مقاصد کے لیے ہیں۔اتل لونڈھے نے میڈیا سے بات کرتے ہوئے کہا، "کانگریس حکومت نے کرناٹک، تلنگانہ، اور ہماچل پردیش میں فلاحی اسکیمیں جیسے کسانوں کو قرض معافی،مفت بس سفر وہ دیگر سہولیات بغیر کسی بڑے پروگرام یا اشتہارات کے انجام دی ہیں۔ لیکن مہاراشٹر میں بی جے پی حکومت اپنی ٹینڈر اور کمیشن پالیسی کے تحت عوام کے پیسے کا بے دریغ استعمال کر رہی ہے۔انہوں نے مزید کہا کہ مہنگائی اور بے روزگاری بڑھتی جا رہی ہے، عوام کو ضروری امداد فراہم نہیں کی جا رہی ہے۔ لونڈھے نے سوال کیاکہ کیا بی جے پی رہنما لاڈلی بہین اسکیم کی ادائیگی اپنی جائیداد بیچ کر کر رہے ہیں؟ نہیں، یہ عوام کے ٹیکس کا پیسہ ہے، جسے اشتہارات اور تقریبات میں ضائع کیا جا رہا ہے۔