ممبئی میٹرو میں معذوروں کے ساتھ نا انصافی ، صحافی دیپک کیتکے کےخط پر وزیرِ اعلیٰ نے نوٹس لیا
- MimTimes मिम टाइम्स م ٹائمز
- 2 days ago
- 2 min read
17 October 2025
ممبئی: ریاست میں بی ای ایس ٹی، ایس ٹی، لوکل ریل اور دیگر عوامی ٹرانسپورٹ سروسز میں معذور شہریوں کو کرایوں میں رعایت فراہم کی جاتی ہے، مگر ممبئی میٹرو میں یہ سہولت نہ ہونے پر معذور مسافروں میں سخت ناراضی پائی جا رہی ہے۔ اس ضمن میں سینئر صحافی دیپک کیتکے نے وزیرِ اعلیٰ دیویندر فڈنویس سے فوری اقدامات کی درخواست کی ہے۔
دیپک کیتکے نے اپنے مکتوب میں واضح کیا کہ دیگر تمام ٹرانسپورٹ سروسز میں دی جانے والی سہولیات کے برخلاف میٹرو میں رعایت نہ ملنے سے معذور مسافروں کو اضافی مالی بوجھ اور ذہنی دباؤ جھیلنا پڑ رہا ہے۔
انہوں نے کہا کہ ایک جانب حکومت نے معذور بہبود کی وزارت قائم کی ہے، اور دوسری جانب میٹرو جیسی عوامی سہولت میں معذوروں کو رعایت سے محروم رکھنا سراسر ناانصافی ہے۔
اس وقت بی ای ایس ٹی اور بیسٹ کی بسوں میں معذوروں کو کرایوں میں چھوٹ حاصل ہے، ریاستی ٹرانسپورٹ (ایس ٹی) بسوں میں انہیں مفت سفر کی اجازت ہے، جبکہ لوکل اور لمبے فاصلے کی ریلوں میں 80 فیصد یا اس سے زیادہ معذوری رکھنے والے مسافروں کو 70 فیصد رعایت، اور ان کے مددگار کو 50 فیصد رعایت دی جاتی ہے۔
سابق وزیرِ اعلیٰ اور موجودہ نائب وزیرِ اعلیٰ ایکناتھ شندے نے میٹرو 7 اور 2A لائنوں پر 25 فیصد رعایت نافذ کی تھی، مگر حال ہی میں شروع ہونے والی میٹرو 3 لائن پر یہ رعایت تاحال نافذ نہیں کی گئی ہے۔
دیپک کیتکے نے یاد دلایا کہ معذور افراد کے حقوق کا قانون (RPWD 2016) اور اقوامِ متحدہ کا معاہدہ (UNCRPD) حکومت پر یہ ذمہ داری عائد کرتے ہیں کہ وہ معذور شہریوں کو عوامی نقل و حمل میں سہولتیں فراہم کرے۔
انہوں نے زور دیتے ہوئے کہا کہ معذور مسافروں کے لیے سفر کی سہولت کوئی احسان نہیں بلکہ ان کا بنیادی حق ہے۔
کیتکے نے وزیرِ اعلیٰ سے اپیل کی کہ وہ ممبئی میٹرو انتظامیہ کو واضح ہدایت دیں اور رعایت سے متعلق پالیسی فوری طور پر نافذ کرنے کا حکم جاری کریں۔ذرائع کے مطابق، وزیرِ اعلیٰ دفتر نے اس مکتوب کی فوری نوٹس لے لی ہے اور متعلقہ محکموں کو ضروری اقدامات کی ہدایت دینے کا عمل شروع کر دیا ہے۔ معذور مسافروں کو جلد ریلیف ملنے کی امید ظاہر کی جا رہی ہے۔
