ईव्हीएम-व्हीव्हीपॅट तपासणीसाठी महाराष्ट्रात १०४ अर्ज दाखल; ७५५ मतदानकेंद्रांचा समावेश

5 December 2024

मुंबई: भारत निवडणूक आयोगाने ईव्हीएम-व्हीव्हीपॅट मशिन्सच्या Burnt memory / microcontroller च्या तपासणी आणि पडताळणीसाठी कार्यपद्धतीबाबत दिलेल्या निर्देशांनुसार महाराष्ट्रातील ३१ जिल्ह्यांतील ९५ विधानसभा मतदारसंघांमधून एकूण १०४ अर्ज प्राप्त झाले आहेत. या अर्जांमध्ये १,००,४८६ मतदानकेंद्रांपैकी ७५५ मतदानकेंद्रांवरील ईव्हीएम संचाच्या तपासणीची मागणी करण्यात आली आहे.

दरम्यान, सिंधुदुर्ग, नंदुरबार, अमरावती, वर्धा आणि गडचिरोली या पाच जिल्ह्यांत अद्याप कोणताही अर्ज प्राप्त झालेला नाही. आयोगाच्या दि.३०.०७.२०२४ च्या निर्देशांनुसार, तपासणीच्या तारखेआधी तीन दिवसांपर्यंत अर्ज मागे घेण्याचा पर्याय अर्जदारांना देण्यात आला आहे, आणि अर्ज मागे घेतल्यास भरलेले शुल्क परत करण्याची तरतूद आहे.

तपासणी प्रक्रियेदरम्यान, निवडणूक याचिका नसलेल्या प्रकरणांमध्ये प्रत्यक्ष मतदानाच्या दिवशीच्या प्रक्रियेचे पुनरावलोकन केले जाते. यामध्ये ईव्हीएम संचातील डेटा क्लियर करून मॉकपोल आयोजित केला जातो. यानंतर सीयु मधील डेटा आणि व्हीव्हीपॅट मशिन्समधील स्लीप्स यांची आकडेवारी तपासून तफावत असल्यास निरीक्षण केले जाते. तपासणी प्रक्रियेनंतर संबंधित ईव्हीएम संचाची कार्यक्षमता सुनिश्चित केली जाते.

– Mim Times News Desk