एसटीच्या भाईंदर पश्चिम येथील जागेचा विकास: वातानुकूलित मच्छी मार्केटसह अनेक सुविधा
- MimTimes मिम टाइम्स م ٹائمز
- Dec 28, 2024
- 1 min read
28 December 2024
मीरा-भाईंदर, राज्य परिवहन मंत्री प्रताप सरनाईक यांनी आज पत्रकार परिषदेत सांगितले की, एसटी महामंडळाच्या भाईंदर पश्चिम येथील 7,400 चौरस मीटर जागेचा विकास मीरा-भाईंदर महानगरपालिकेच्या माध्यमातून करण्यात येणार आहे. या प्रकल्पात वातानुकूलित मच्छी मार्केट, इलेक्ट्रिक बस आगार, बसस्थानक आणि परिवहन विभागाचे उपप्रादेशिक कार्यालय उभारले जाणार आहे.
या प्रकल्पात 30 हजार चौरस मीटर क्षेत्रावर वातानुकूलित मच्छी मार्केट तयार होईल. याशिवाय रेल्वे प्रवाशांसाठी पे ॲड पार्किंगची सोय देखील केली जाईल. प्रकल्पाचा एकूण खर्च 136 कोटी रुपये असून, तो राज्य शासन आणि महापालिका संयुक्तपणे उचरणार आहेत.
मंत्री सरनाईक यांनी सर्व महापालिका क्षेत्रांमध्ये उपप्रादेशिक परिवहन कार्यालय सुरू करण्याची घोषणा केली. यामुळे स्थानिक नागरिकांना जिल्हा स्तरावर जाण्याची गरज भासणार नाही, आणि त्यांची कामे सहज महापालिका क्षेत्रात पूर्ण होतील.
मीरा-भाईंदरमधील उत्तन येथे 9,700 चौरस मीटर जागेवर स्वयंचलित संगणकीय वाहन चाचणी केंद्र आणि वाहन चालक चाचणी मार्ग उभारण्याची योजना जाहीर झाली. ही केंद्रे राज्यातील प्रत्येक जिल्ह्यात उभारली जाणार असल्याचे मंत्री सरनाईक यांनी स्पष्ट केले.
एका प्रवाशाने एसटीच्या संगणकीय आरक्षण केंद्राच्या वेळेबाबत तक्रार केली होती. त्यानुसार, मंत्री सरनाईक यांनी तत्काळ आदेश देऊन आरक्षण केंद्राची वेळ सकाळी 6 ते रात्री 10 अशी वाढवण्याचा निर्णय घेतला.
या वेळी परिवहन विभागाचे आयुक्त विवेक भीमनवार, मीरा-भाईंदर महापालिकेचे आयुक्त संजय काटकर, आणि एसटी महामंडळाचे उपाध्यक्ष डॉ. माधव कुसेकर हे उपस्थित होते.
हा प्रकल्प स्थानिक लोकांसाठी अत्यंत उपयुक्त ठरेल आणि मीरा-भाईंदर शहराच्या विकासाला नवी दिशा देईल.
Video
