कौशल्य विकास विभागाचे नाविन्यपूर्ण उपक्रम कौतुकास्पद - केंद्रीय कौशल्य विकास राज्यमंत्री जयंत चौधरी

मुंबई, 3 ऑक्टोबर - महाराष्ट्र शासनाने युवकांच्या विकासासाठी कौशल्य विद्यापीठ स्थापन केले असून, हे देशातील एकमेव कौशल्य विद्यापीठ आहे, जिथे कौशल्ययुक्त शिक्षण देऊन प्रत्यक्ष रोजगार मिळवण्यावर भर दिला जात आहे. केंद्रीय कौशल्य विकास व उद्योजकता राज्यमंत्री जयंत चौधरी यांनी यास अत्यंत अभिमानाची बाब म्हणून सांगितले.

एल्फिन्स्टन तांत्रिक विद्यालय येथे आय. टी. आय मुंबईचे नामकरण 'भारतरत्न डॉ. बाबासाहेब आंबेडकर शासकीय औद्योगिक प्रशिक्षण संस्था' असे करण्यात आले, तर संत गाडगेबाबा स्वच्छ भारत प्रबोधिनीच्या सहा ठिकाणांचा शुभारंभ गोरेगाव, पुणे, नाशिक, छत्रपती संभाजी नगर, अमरावती आणि नागपूर येथे झाला. या कार्यक्रमात केंद्रीय राज्यमंत्री जयंत चौधरी, कौशल्य विकास मंत्री मंगलप्रभात लोढा, उत्तर प्रदेशचे विज्ञान आणि तंत्रज्ञान मंत्री अनिल कुमार, तसेच अनेक मान्यवर उपस्थित होते.

राज्यमंत्री चौधरी म्हणाले, "आजचा क्षण ऐतिहासिक आहे, कारण भारतरत्न डॉ. बाबासाहेब आंबेडकर यांच्या वास्तूला त्यांचेच नाव देण्यात आले आहे. या महापुरूषांचे विचार युवा पिढीने आत्मसात करणे आवश्यक आहे, जेणेकरून आपल्या देशाला तिसरी आर्थिक महासत्ता बनवण्यासाठी कौशल्यपूर्ण विकास साधता येईल."

कौशल्य विकास मंत्री लोढा यांनी सांगितले की, महाराष्ट्र हे देशाचे ग्रोथ इंजिन बनण्यासाठी अनेक नाविन्यपूर्ण उपक्रम राबवले जात आहेत. प्रधानमंत्री नरेंद्र मोदी यांच्या योजनेच्या धर्तीवर राज्यात कौशल्य विकास विभाग कुशल व रोजगारक्षम महाराष्ट्र घडविण्यासाठी प्रयत्नशील आहे.

उत्तर प्रदेशचे मंत्री अनिल कुमार यांनीही संत गाडगेबाबा यांच्या कर्मभूमीत उभा राहणे ही आनंदाची गोष्ट असल्याचे व्यक्त केले. त्यांनी तरुण पिढीला काळानुरूप शिक्षण घेण्यास आणि देशाच्या विकासात योगदान देण्याची प्रेरणा दिली.

यावेळी संत गाडगेबाबा स्वच्छ भारत प्रबोधिनीचे प्रतिनिधी दीप्ती जाधव, सुरज महाजन, सागर भारती, प्रमोद दुंगी, प्रदीप काटकर आणि प्रफुल्ल भुसारी यांचा सत्कार करण्यात आला.