जनतेचे दिवाळे काढून शिंदे भाजपची दिवाळी!: रमेश चेन्नीथला** सरकारच्या चुकीच्या धोरणांमुळे उद्ध्वस्त झाले सोयाबीन, कापूस, कांदा उत्पादक शेतकरी; काँग्रेसची ६ नोव्हेंबरला गॅरंटी जाहीर करण्याची घोषणा

2 November 2024

मुंबई,भाजप-शिंदे सरकारच्या शेतकरीविरोधी धोरणांमुळे महाराष्ट्रातील सोयाबीन, कापूस, कांदा उत्पादक शेतकरी संकटात आहेत, असा आरोप काँग्रेसचे महाराष्ट्र प्रभारी रमेश चेन्नीथला यांनी केला आहे. वाढती महागाई आणि शेतीमालाला कमी दरामुळे राज्यातील शेतकऱ्यांचे आर्थिक दिवाळे निघाले असताना, भाजप-शिंदे सरकार मात्र दिवाळी साजरी करत असल्याचे ते म्हणाले. 

टिळक भवन येथे झालेल्या पत्रकार परिषदेत वंचित आघाडीचे नेते आणि माजी मंत्री अनिस अहमद यांनी काँग्रेसमध्ये प्रवेश केला. यावेळी चेन्नीथला यांनी केंद्र आणि राज्य सरकारवर सडकून टीका केली. देशातील सर्वात मोठा कापूस उत्पादक असणाऱ्या महाराष्ट्रातील कापसाचे दर कमी होण्यास केंद्र सरकारचे आयात-निर्यात धोरण कारणीभूत असल्याचा आरोप त्यांनी केला. सोयाबीन आणि कांद्याच्या बाबतीतही शेतकऱ्यांच्या हिताच्या विरोधात निर्णय घेतल्याचा मुद्दा त्यांनी उपस्थित केला.

शेतकऱ्यांना आधार देण्यासाठी काँग्रेस ६ नोव्हेंबरला नवी गॅरंटी योजना जाहीर करणार आहे, असेही त्यांनी सांगितले.