top of page
Search

जनसुरक्षा विधेयकामुळे अभिव्यक्ती स्वातंत्र्यावर कोणताही आघात होणार नाही; पत्रकार संरक्षण कायद्याच्या नोटीफिकेशनसाठी तात्काळ कारवाईचे निर्देश – मुख्यमंत्री फडणवीस

10 April 2025


मुंबई,महाराष्ट्रात प्रस्तावित असलेल्या विशेष जनसुरक्षा विधेयकामुळे नागरिकांच्या अभिव्यक्ती स्वातंत्र्यावर कोणतीही बाधा येणार नाही, असे आश्वासन मुख्यमंत्री देवेंद्र फडणवीस यांनी आज पत्रकार अभिव्यक्ती संरक्षण मंचाच्या पदाधिकाऱ्यांसमवेत झालेल्या बैठकीत दिले.

सह्याद्री अतिथीगृह येथे पार पडलेल्या या बैठकीत राज्यातील प्रमुख १४ पत्रकार संघटनांच्या प्रतिनिधींनी या विधेयकाच्या तरतुदींवर घेतलेल्या आक्षेपांची सविस्तर मांडणी केली. पत्रकार अभिव्यक्ती संरक्षण मंचच्या वतीने एस.एम. देशमुख, संदीप चव्हाण, दिलीप सपाटे, यदु जोशी, विशाल सिंग, पंकज दळवी, इंद्रकुमार जैन, प्रदीप मैत्रा, दीपक भातूसे, श्रीकिशन काळे यांनी या मुद्यांवर पत्रकार संघटनांचे मत मुख्यमंत्र्यांच्या निदर्शनास आणून दिले.

पत्रकारांनी यावेळी जनसुरक्षा विधेयकाबाबत समाजात निर्माण झालेली भीती व्यक्त करताना हे विधेयक अभिव्यक्ती स्वातंत्र्यावर घाला आहे असे प्रथमदर्शनी मत लोकांमध्ये तयार होत असल्याचे सांगितले. मुख्यमंत्री फडणवीस यांनी हे मत चुकीचे असून, याविषयी सरकार पातळीवर जनजागृती केली जाईल, असे स्पष्ट केले.

मुख्यमंत्र्यांनी सांगितले की, हा कायदा कोणत्याही वैयक्तिक व्यक्तीविरोधात नसून, नक्षलवादी प्रवृत्ती आणि त्यांना बळ देणाऱ्या संघटनांविरोधात आहे. छत्तीसगड, तेलंगणा आणि ओडिशासारख्या नक्षलग्रस्त राज्यांत यापूर्वीच हे कायदे लागू करण्यात आले आहेत. महाराष्ट्रात मात्र या कायद्याच्या अभावामुळे नक्षली संघटनांची मुख्यालये राज्यात उभारली जात असल्याचे ते म्हणाले.

या विधेयकाच्या अंमलबजावणीसाठी तीन सदस्यीय न्यायाधीश समिती स्थापन केली जाणार असून, त्यांच्या संमतीनंतरच गुन्हा दाखल केला जाईल. त्यामुळे कायद्याचा गैरवापर होणार नाही, असेही त्यांनी सांगितले. तसेच, पत्रकार संघटनांच्या लेखी सूचना आल्यास अंतिम मसुदा तयार करताना त्याचा विचार केला जाईल, असेही त्यांनी जाहीर केले.

या बैठकीला खालील संघटनांचे प्रतिनिधी उपस्थित होते :


• मुंबई मराठी पत्रकार संघ


• मराठी पत्रकार परिषद


• मुंबई प्रेस क्लब


• विधीमंडळ वार्ताहर संघ


• अधिस्विकृती पत्रकार समिती


• टीव्ही जर्नालिस्ट असोसिएशन


• बृहन्मुंबई यूनियन ऑफ जर्नालिस्ट


• बृहन्मुंबई महानगरपालिका वार्ताहर संघ


• मुंबई क्राइम रिपोर्टर असोसिएशन


• पुणे श्रमिक पत्रकार संघ


• मुंबई हिंदी पत्रकार संघ


• नॅशनल यूनियन जर्नालिस्ट ऑफ इंडिया


• महाराष्ट्र श्रमिक पत्रकार संघ


• जर्नालिस्ट यूनियन ऑफ महाराष्ट्र (नागपूर)


पत्रकार संरक्षण कायद्याच्या नोटीफिकेशनसाठी मुख्यमंत्र्यांची तत्काळ कारवाई


या बैठकीदरम्यान पत्रकार संरक्षण कायद्याच्या अंमलबजावणीचा मुद्दा एस.एम. देशमुख यांनी उपस्थित करताच मुख्यमंत्री फडणवीस यांनी गृहसचिवांना तत्काळ नोटीफिकेशन काढण्याच्या सूचना दिल्या. तसेच, पत्रकार सन्मान योजनेच्या अटी अत्यंत जाचक असून त्यामुळे अनेक ज्येष्ठ पत्रकार योजनेपासून वंचित राहतात, याकडेही लक्ष वेधले गेले. यावर मुख्यमंत्री यांनी योजनेच्या अटी शिथिल करण्याच्या सूचना संबंधित अधिकाऱ्यांना दिल्या.

या बैठकीच्या निमित्ताने मुख्यमंत्री देवेंद्र फडणवीस आणि राज्यातील पत्रकार संघटनांमध्ये संवाद निर्माण झाला असून, पत्रकारितेच्या अभिव्यक्ती स्वातंत्र्याला सरकार कटीबद्ध असल्याचे पुन्हा एकदा स्पष्ट करण्यात आले आहे.

bottom of page