ज्येष्ठ पत्रकार नितीन चव्हाण यांना बृहन्मुंबई महापालिका वार्ताहर संघातर्फे श्रद्धांजली

मुंबई, १४ ऑक्टोबर , बृहन्मुंबई महापालिका वार्ताहर संघाचे सल्लागार आणि ज्येष्ठ पत्रकार नितीन चव्हाण यांच्या दीर्घकालीन आजारानंतर १ ऑक्टोबर रोजी निधन झाले. त्यांच्या निधनानंतर, सोमवारी बृहन्मुंबई महापालिका वार्ताहर संघाने महापालिका मुख्यालयातील पत्रकार कक्षात एक शोकसभा आयोजित केली होती, ज्यामध्ये दिवंगत नितीन चव्हाण यांना भावपूर्ण श्रद्धांजली अर्पण करण्यात आली.या शोकसभेला नितीन चव्हाण यांच्या पत्नी पूजा चव्हाण, मुलगा ऋृषी आणि मुलगी वैष्णवी यांची उपस्थिती होती. त्यांच्या सहवासातील अनेकांनी त्यांच्याबद्दलच्या आठवणींना उजाळा दिला.नितीन चव्हाण यांनी आपल्या २७ वर्षांच्या पत्रकारितेत दै. मुंबई तरुण भारत, दै. सकाळ, दै. सामना, आणि दै. महाराष्ट्र टाइम्स यांसारख्या प्रतिष्ठित वृत्तपत्रांमधून काम केले. विशेषतः त्यांनी १५ वर्षे मुंबई महापालिकेच्या कामकाजाचे सखोल वृत्तसंकलन केले. त्यांची धडाडी आणि निर्भीड पत्रकारिता यामुळे ते क्षेत्रात नावाजले गेले.

शोकसभेत बृहन्मुंबई महापालिका वार्ताहर संघाचे अध्यक्ष मारुती मोरे, सरचिटणीस राजेश सावंत, माजी अध्यक्ष आणि सल्लागार विष्णू सोनवणे, ज्येष्ठ पत्रकार सुनील शिंदे, तसेच दै. महाराष्ट्र टाइम्सचे समीर कर्वे यांनी त्यांना श्रद्धांजली अर्पण केली आणि त्यांच्या स्मृतींना उजाळा दिला. या वेळी भाजपचे माजी नगरसेवक भालचंद्र शिरसाट, महापालिका उप जनसंपर्क अधिकारी गणेश पुराणिक, कामगार नेते संजय कांबळे - बापेरकर यांनी देखील नितीन चव्हाण यांना श्रद्धांजली वाहत त्यांच्या कार्याची आठवण केली. महापालिका जनसंपर्क अधिकारी तानाजी कांबळे यांनी पुष्प अर्पण करून श्रद्धांजली अर्पण केली.शोकसभेला बृहन्मुंबई महापालिका वार्ताहर संघाचे विविध पदाधिकारी, सदस्य आणि इतर मान्यवरांची उपस्थिती होती.