ज्येष्ठ पत्रकारांना दिलासा: 'बाळशास्त्री जांभेकर सन्मान निधी'त वाढ; जीआरची लवकर अंमलबजावणी होणार मंत्रालय आणि विधिमंडळ वार्ताहर संघाच्या मागणीला यश, मुख्यमंत्री देवेंद्र फडणवीस यांची घोषणा

9 December 2024

मुंबई, राज्यातील निवृत्त ज्येष्ठ पत्रकारांसाठी ‘आचार्य बाळशास्त्री जांभेकर पत्रकार सन्मान योजने’चे निकष शिथिल करण्यात येणार असून, सन्मान निधी दरमहा २० हजार रुपये करण्यात येईल, अशी घोषणा मुख्यमंत्री देवेंद्र फडणवीस यांनी केली आहे. या निर्णयावर येत्या आठवड्यात कार्यवाही होणार असल्याचेही त्यांनी स्पष्ट केले.

मुख्यमंत्रीपदाची शपथ घेतल्यानंतर मुख्यमंत्री देवेंद्र फडणवीस यांनी प्रथेनुसार मंत्रालयातील पत्रकार कक्षाला भेट देत पत्रकारांशी संवाद साधला. यावेळी, मंत्रालय आणि विधिमंडळ वार्ताहर संघाचे अध्यक्ष प्रमोद डोईफोडे यांच्या हस्ते मुख्यमंत्र्यांचा सत्कार करण्यात आला. यावेळी डोईफोडे यांनी पत्रकार सन्मान निधी वाढीचा मुद्दा उपस्थित केला.

डोईफोडे यांनी यावेळी माजी मुख्यमंत्री एकनाथ शिंदे यांच्या २०२३ मधील आश्वासनाचा उल्लेख करत सरकारने दिलेल्या वचनांची अंमलबजावणी तातडीने करावी, अशी विनंती केली. या मागणीला सकारात्मक प्रतिसाद देत मुख्यमंत्री फडणवीस यांनी सन्मान निधी वाढ व निकष शिथिल करण्याचा निर्णय जाहीर केला.

राज्यातील ज्येष्ठ पत्रकारांना आर्थिक आधार मिळावा व सन्मान वाढावा, यासाठी वार्ताहर संघाने केलेल्या सातत्यपूर्ण पाठपुराव्याला अखेर यश आले आहे. मुख्यमंत्री फडणवीस यांच्या या निर्णयामुळे राज्यातील पत्रकारांमध्ये समाधानाचे वातावरण असून लवकरच योजनेची अंमलबजावणी होईल, अशी अपेक्षा व्यक्त होत आहे.

कार्यक्रमास संघाचे सरचिटणीस प्रविण पुरो, कोषाध्यक्ष विनोद यादव, खंडूराज गायकवाड, भगवान परब, अलोक देशपांडे, मनोज मोघे यांच्यासह अनेक पत्रकार उपस्थित होते.