दिल्ली दौऱ्यात मुख्यमंत्री फडणवीस यांनी महाराष्ट्राच्या संस्कृतीचे दर्शन घडवले

नवी दिल्ली, 12 डिसेंबर: महाराष्ट्राचे मुख्यमंत्री देवेंद्र फडणवीस यांनी आपल्या तिसऱ्या कार्यकाळात दिल्लीचा दोन दिवसांचा दौरा केला. या दौऱ्यात त्यांनी सात प्रमुख नेत्यांची भेट घेतली आणि महाराष्ट्राच्या समृद्ध संस्कृतीचे प्रतीक असलेल्या पाच विशेष मूर्ती भेट दिल्या.

मुख्यमंत्री फडणवीस यांनी राष्ट्रपती द्रौपदी मुर्मू आणि उपराष्ट्रपती जगदीप धनखड यांची भेट घेतली. यावेळी त्यांनी त्यांना विठ्ठल-रुक्मिणीची मूर्ती भेट दिली. पंतप्रधान नरेंद्र मोदी यांना छत्रपती शिवाजी महाराजांची अश्वारूढ मूर्ती भेट देत मराठा शौर्याचे प्रतीक सादर केले.

केंद्रीय गृहमंत्री अमित शाह यांना वीर सावरकरांची मूर्ती तर केंद्रीय आरोग्य मंत्री जे.पी. नड्डा यांना गाय आणि वासराच्या मूर्तीचे प्रतीकात्मक भेट दिली. संरक्षण मंत्री राजनाथ सिंह आणि केंद्रीय मंत्री नितीन गडकरी यांना सिद्धीविनायकाचे प्रतिकात्मक मूर्ती भेट दिल्या.

याच बैठकीत मुख्यमंत्री फडणवीस यांनी राजनाथ सिंह, नितीन गडकरी आणि जे.पी. नड्डा यांच्यासोबत महाराष्ट्राच्या प्रगतीसाठी महत्त्वाच्या प्रकल्पांवर चर्चा केली.

या भेटींद्वारे मुख्यमंत्री फडणवीस यांनी महाराष्ट्राच्या सांस्कृतिक वारशाचे दर्शन घडवत राष्ट्रीय नेत्यांसोबत राज्याच्या विकासासाठी दृढ संबंध प्रस्थापित केले.