धारावी पुनर्विकासाच्या विरोधात दलित आणि कष्टकऱ्यांविषयीच्या द्वेषाची प्रवृत्ती? खासदार राहुल शेवाळे यांचा महाविकास आघाडीवर थेट आरोप

9 November 2024

मुंबई,महाविकास आघाडी सरकारकडून गेल्या अनेक वर्षांपासून धारावी पुनर्विकासाला होत असलेल्या विरोधामागे दलित समाज आणि कष्टकऱ्यांविषयी द्वेषाची भावना असल्याचा आरोप शिवसेना उपनेते आणि माजी खासदार राहुल रमेश शेवाळे यांनी केला आहे. धारावीतील पुनर्विकासाला विरोध करून या समाजातील लोकांवर अन्याय होत असल्याचे सांगून, हे प्रकरण एक जातीय आणि आर्थिक संघर्षाचे प्रतीक बनले असल्याचे शेवाळे यांनी व्यक्त केले.

नरिमन पॉईंट येथील वंदनीय हिंदुहृदयसम्राट बाळासाहेब ठाकरे भवनात बोलताना, शेवाळे यांनी धारावीतील दलित, वाल्मिकी, कुंचीकोरवे, नाडार यांसारख्या विविध समाजाच्या हक्कांवर अन्याय होत असल्याचा मुद्दा मांडला. “धारावी ही अनुसूचित जातीसाठी आरक्षित विधानसभा आहे, आणि येथील पुनर्विकास थांबवणे म्हणजे या समाजांवर अन्याय आहे,” असे मत त्यांनी व्यक्त केले. धारावी पुनर्विकासाचा मुद्दा महाविकास आघाडीला राजकीय फायद्यासाठी वापरला जात असून, त्यामागे धारावीतील समाजाच्या विरोधात असलेली असूया आहे, असा आरोपही शेवाळे यांनी केला.

मुंबईतील प्रलंबित प्रकल्पांना न्याय का नाही?

शेवाळे यांनी उपस्थित केलेल्या प्रश्नांमध्ये धारावीतील पुनर्विकासाला विरोध करणाऱ्या महाविकास आघाडीच्या भूमिकेवर टिका केली आहे. मुंबईतील म्हाडा, एसआरए, वडाळा, घाटकोपर येथील रमाबाई आंबेडकर नगर, गोरेगाव मधील पत्रा चाळ, तसेच दादर, कोळीवाडे आणि निर्वासित वसाहतींमधील पुनर्विकास प्रकल्प वर्षानुवर्ष प्रलंबित आहेत, तरी या प्रकल्पांसाठी महाविकास आघाडीने मोर्चा का काढला नाही, असा सवाल शेवाळे यांनी उपस्थित केला.

धारावी विरोधात असलेल्या वक्तव्यावर संताप

शेवाळे यांनी उद्धव ठाकरे गटाच्या धारावी विरोधातील वक्तव्यावर संताप व्यक्त केला आहे. “धारावीमुळे मुंबई बकाल होईल,” असे वक्तव्य करत धारावीतील कामगार आणि कष्टकऱ्यांचा अपमान करणाऱ्या या मतावर धारावीकर मतदानातून उत्तर देतील, असे ते म्हणाले. कोरोनाच्या काळात धारावीतील नागरिकांनी ज्या पद्धतीने मुंबईकरांना मदत केली, त्यावर गौरव करण्याऐवजी या घटकाला तिरस्कार दाखवला जात आहे, असेही शेवाळे यांनी नमूद केले.

पुनर्विकास रोखणाऱ्या विकासकांचा संबंध कोणाशी?

घाटकोपर येथील रमाबाई आंबेडकर नगरचा पुनर्विकास रोखणाऱ्या विकासकांचा संबंध महाविकास आघाडीसोबत असलेल्या काही मित्रांशी असल्याचा आरोप शेवाळे यांनी केला आहे. धारावी पुनर्विकास प्रकल्पाला विरोध करत मुंबईतील इतर ठिकाणी रखडलेले प्रकल्प वाढवणाऱ्या या विकासकांना राजकीय पाठबळ मिळत असल्याचा आक्षेप त्यांनी मांडला.

शेवाळे यांच्या या आरोपांनी मुंबईतील पुनर्विकास धोरणाच्या राजकीय बाजूवर प्रकाश टाकला असून, धारावीकरांना आता न्याय मिळावा आणि त्यांचे जीवनमान सुधारावे, अशी अपेक्षा या भागातील नागरिकांकडून व्यक्त होत आहे.