नवनियुक्त अग्निशामक कर्मचाऱ्यारी ऑगस्ट २०२४ पासून वेतन आणि प्रशिक्षण भत्त्यापासून वंचित

30 January 2025

सचिन उन्हाळेकर

मुंबई : एकीकडे प्रतिक्षा यादी प्रसिद्ध करुन अग्नीशामक पदाच्या भरती प्रक्रियेतील शिल्लक जागा भरण्याच्या मागणीसाठी उमेदवारांनी आझाद मैदानात बेमुदत आंदोलन पुकारले आहे. तर दुसरीकडे मुंबई अग्निशमन दलामध्ये नवनियुक्त २३६ अग्निशामकांना ऑगस्ट २०२४ पासून वेतन आणि प्रशिक्षण भत्त्या मिळालेला नाही.

मुंबई महापालिकेच्या अग्निशमन दलामध्ये १६ ऑगस्ट २०२४ रोजी २३६ अग्निशामक कर्मचाऱ्यांची नियुक्ती करण्यात आली होती. नवनियुक्त अग्निशामक कर्मचाऱ्यांमध्ये महाराष्ट्राच्या ग्रामीण भागातून, गरीब घरातून  अनेक मुले- मुली भरती झालेले आहेत. मात्र ऑगस्ट २०२४ पासून २३६ अग्निशामकांना वेतन आणि प्रशिक्षण भत्त्या मिळालेला नाही. सध्या त्यांनी तात्पुरता नातेवाईकांकडे आसरा घेतला असला तरी वेतन न मिळाल्यामुळे खायचे काय, आणि प्रवास कसा करायचा, हे प्रश्न रोज त्यांच्यासमोर यक्ष म्हणून उभे असतात. कित्येक मुले - मुली त्यामुळे कर्जाच्या विळख्यात सापडण्याचा संभव असल्याची माहिती दि म्युनिसिपल युनियनचे सरचिटणीस रमाकांत बने यांनी दिली.

महापालिका अग्निशमन दल प्रशासनाचा गलथानपणा, प्रशासकीय उदासीनतामुळे

नवनियुक्त अग्निशामक कर्मचाऱ्यांना ऑगस्ट २०२४ मध्ये झालेल्या त्यांच्या नियुक्तीपासून आजतागायत कायदेशीर वेतनापासून वंचित असल्याचा आरोप ही बने यांनी केला आहे. या नवनियुक्त अग्नीशामक कर्मचाऱ्यांना प्रशिक्षण भत्ता ही देण्यात आलेला नाही, असेही बने यांनी सांगितले.

महापालिका अग्निशमन दल प्रशासनाची उपरोक्त उदासीन कृती ही महापालिकेला लागू असलेल्या विविध कामगार कायद्याच्या तरतुदींचा भंग तर आहेच, त्याशिवाय फौजदारी गुन्हा दाखल होऊ शकेल अशी कृती असल्याचे बने यांनी सांगितले.

दरम्यान, संबंधित सर्व नवनियुक्त अग्निशामकांना त्यांच्या कायदेशीर वेतनाचे तसेच प्रशिक्षण भत्त्याचे अधिदान थकबाकीसह माहे फेब्रुवारी २०२५ च्या वेतनाबरोबर करण्यात यावे, अशी विनंती महापालिका उप आयुक्त (वित्त) व प्रमुख अग्निशमन अधिकारी यांना करण्यात आली आहे, असे बने यांनी सांगितले.