बेस्ट कर्मचाऱ्यांना दिवाळी बोनसचा मार्ग मोकळा, निवडणूक आयोगाच्या परवानगीची प्रतीक्षा

4 November 2024

मुंबई: बृहन्मुंबई इलेक्ट्रिक सप्लाय आणि ट्रान्सपोर्ट (बेस्ट) उपक्रमातील कर्मचाऱ्यांसाठी दिवाळी बोनस लवकरच वाटप करण्यात येणार आहे. आज, ०४ नोव्हेंबर २०२४ रोजी बेस्ट उपक्रमाचे महाव्यवस्थापक यांनी सर्व कामगार संघटनांच्या पदाधिकाऱ्यांबरोबर कुलाबा येथील कार्यालयात यासंदर्भात बैठक घेतली. बेस्ट उपक्रमातील सेवकवर्ग सदस्यांना २०२३-२४ या लेखा वर्षाकरिता सानुग्रह अनुदान देण्यासाठी बृहन्मुंबई महानगरपालिकेकडून ८० कोटी रुपयांचा निधी प्राप्त झाला आहे.

मात्र, सध्या सुरु असलेल्या निवडणूक आचारसंहितेमुळे बोनस वितरणासाठी माननीय मुख्य निवडणूक आयुक्तांकडून शहानिशा करून किंवा त्यांच्या परवानगीची आवश्यकता आहे. आयुक्तांची परवानगी मिळाल्यानंतर त्वरित कर्मचाऱ्यांच्या बँक खात्यात बोनसची रक्कम जमा करण्यात येणार आहे, असे उपक्रमाकडून आश्वासन देण्यात आले आहे.

बेस्ट कामगार सेनेचे अध्यक्ष श्री. सुहास सामंत यांच्या पुढाकाराने हा मुद्दा मार्गी लागला आहे. उपलब्ध माहितीनुसार, २९ हजाराचा बोनस कर्मचाऱ्यांना जाहीर करण्यात येणार आहे.