मंत्रालय व विधीमंडळ वार्ताहर संघ निवडणूक निकाल जाहीर दिलीप सपाटे अध्यक्षपदी विजयी; दीपक भातुसे सरचिटणीसपदी

1 February 2025

मुंबई: मंत्रालय आणि विधीमंडळ वार्ताहर संघाच्या यंदाच्या निवडणुकीत ‘पुढारी’चे दिलीप सपाटे यांनी १२४ मतांनी बाजी मारत अध्यक्षपद पटकावले. त्यांचा प्रतिस्पर्धी दिलीप जाधव यांना केवळ ३७ मते मिळाली, तर ७ मतदारांनी नोटाचा पर्याय निवडला.

उपाध्यक्षपदासाठी तिरंगी लढत रंगली होती. ‘इंडियन एक्स्प्रेस’चे आलोक देशपांडे यांनी ८० मतांसह विजय मिळवला. राजू झनके यांना ४७, तर भगवान परब यांना ३४ मते मिळाली.

सरचिटणीसपदावर ‘लोकमत’चे दीपक भातुसे विजयी झाले. त्यांनी ९५ मतांनी प्रवीण पुरो (६४) यांचा पराभव केला. कोषाध्यक्षपदासाठी तिन्ही उमेदवारांमध्ये रंगलेल्या चुरशीच्या लढतीत ‘दिव्य भास्कर’चे विनोद यादव यांनी १०१ मते मिळवत विजय मिळवला. मिलिंद लिमये यांना ४६ मते मिळाली, तर प्रवीण राऊत यांनी तांत्रिक माघार घेतली होती.

कार्यकारिणी सदस्यपदासाठी एकूण ५ जागांसाठी लढत झाली. त्यात मनोज दुबे (१०४), सुजित महामूलकर (१०२), खंडूराज गायकवाड (१००), प्रशांत बारसिंग (९१) आणि राजन शेलार (८७) यांनी विजय मिळवला. नेहा पुरव (८३) अनंत नलावडे (४५) आणि रईस अहमद अन्सारी (३७) यांना पराभवाचा सामना करावा लागला.

या निवडणुकीत एकूण १८० मतदारांपैकी १६८ मतदारांनी आपला हक्क बजावला, जे ९३ टक्के मतदान आहे. निवडणूक प्रक्रियेत अशोक अडसूळ (लोकसत्ता), अशोक शिंदे (युगधर्म) आणि अजय गोरड (पुण्यनगरी) हे निवडणूक अधिकारी म्हणून कार्यरत होते. त्यांच्या सहकार्याने श्रीरंग सुर्वे , वैशाली होगळे व इतर यांनी काटेकोर व्यवस्थापन केले.

विजयी उमेदवारांसमोर पत्रकारांच्या समस्या सोडवणे आणि संघटनेचे कार्य अधिक मजबूत करणे हे मोठे आव्हान असणार आहे.