मंत्री धनंजय मुंडे आणि माणिकराव कोकाटे यांच्या राजीनाम्याच्या मागणीसाठी महाविकास आघाडीचे आंदोलन तीव्र विधिमंडळाच्या पायऱ्यांवर सरकारविरोधात घोषणाबाजी
- MimTimes मिम टाइम्स م ٹائمز
- Mar 4
- 1 min read
4 March 2025
मुंबई , मस्साजोग गावचे सरपंच संतोष देशमुख यांच्या निर्घृण हत्येच्या पार्श्वभूमीवर महाविकास आघाडीचे आमदार आक्रमक झाले आहेत. राज्याचे कृषी मंत्री धनंजय मुंडे आणि आमदार माणिकराव कोकाटे यांच्या राजीनाम्याच्या मागणीसाठी महाविकास आघाडीने विधिमंडळाच्या पायऱ्यांवर तीव्र आंदोलन केले.
See video
विरोधी पक्षाच्या आमदारांनी "महायुतीचे दो गुंडे, कोकाटे-मुंडे!", "खुनी सरकार, हाय हाय!" अशा घोषणा देत सरकारचा निषेध केला. संतोष देशमुख यांच्या हत्येचे भयावह फोटो आणि व्हिडिओ समोर आल्यानंतर राज्यभर संतापाची लाट उसळली आहे. सरकारवर आरोपींना पाठीशी घालण्याचा आरोप करत विरोधकांनी मंत्र्यांच्या तात्काळ राजीनाम्याची मागणी केली आहे.
महाराष्ट्र काँग्रेस प्रदेशाध्यक्ष हर्षवर्धन सपकाळ यांनी स्पष्ट शब्दांत मुख्यमंत्री देवेंद्र फडणवीस आणि उपमुख्यमंत्री अजित पवार यांना राजीनामा देण्याची मागणी केली आहे. "या क्रूर हत्येची सर्व माहिती सरकारकडे असूनही धनंजय मुंडे यांना दोन महिने वाचवण्याचा प्रयत्न करण्यात आला. हे प्रकरण दडपण्यासाठी सत्ताधारी जबाबदार आहेत," असे सपकाळ म्हणाले.
त्यांनी पुढे सांगितले की, "फक्त मुंडे यांनी राजीनामा दिल्याने सरकार निर्दोष होत नाही. सरकारने मुंडे यांना बडतर्फ का केले नाही? मुख्यमंत्र्यांनी हे स्पष्टीकरण द्यावे. संपूर्ण महाराष्ट्र या प्रकरणामुळे संतप्त आहे आणि सरकारच्या या भूमिकेने राज्याची मान खाली गेली आहे."
या वादात अखेर धनंजय मुंडे यांनी प्रकृती अस्वास्थ्याचे कारण देत आपल्या मंत्रिपदाचा राजीनामा दिला आहे. "संतोष देशमुख हत्या प्रकरणाचा तपास पूर्ण झाला असून न्यायालयीन चौकशी प्रस्तावित आहे. माझ्या प्रकृतीच्या कारणास्तव मी मंत्रिपदाचा राजीनामा दिला आहे," असे मुंडे यांनी आपल्या निवेदनात स्पष्ट केले.
या संपूर्ण प्रकरणामुळे राज्यातील राजकीय वातावरण तापले असून विरोधकांचा आक्रमक मोर्चा महायुती सरकारसाठी मोठे आव्हान ठरणार आहे. मुख्यमंत्री आणि उपमुख्यमंत्र्यांनी या प्रकरणावर स्पष्ट भूमिका घ्यावी, अशी मागणी जोर धरू लागली आहे. आता या राजीनाम्यानंतर सरकारवर काय परिणाम होतो, हे पाहणे महत्त्वाचे ठरणार आहे.
