मशीद बंदर रेल्वे स्थानकाजवळील कर्नाक रेल्वे उड्डाणपुलाची पहिली तुळई स्थापित

22 October 2024

मुंबई,मशीद बंदर रेल्वे स्थानकाजवळील कर्नाक रेल्वे उड्डाणपूल प्रकल्पात महत्त्वपूर्ण टप्पा गाठत, पहिली तुळई (गर्डर) यशस्वीरित्या स्थापित करण्यात आली आहे. शनिवार, १९ ऑक्टोबर २०२४ आणि रविवार, २० ऑक्टोबर २०२४ रोजी मध्यरात्री १२.३० ते पहाटे ३.३० दरम्यान, रेल्वे प्रशासनाच्या विशेष ब्लॉकमध्ये ही तुळई बसविण्याचे काम पूर्ण झाले. तुळई स्थानांतराची (साईड शिफ्टिंग) प्रक्रिया यशस्वी झाल्यामुळे आता दुसरी तुळई बसविण्याच्या कामाला गती मिळणार आहे.

हा पूल दक्षिण मुंबईतील मशीद बंदर, छत्रपती शिवाजी महाराज टर्मिनस, आणि मोहम्मद अली रोड परिसरातील वाहतुकीसाठी महत्त्वाचा आहे. कर्नाक पूल धोकादायक स्थितीत आल्यामुळे बृहन्मुंबई महानगरपालिकेने पुनर्बांधणीचा निर्णय घेतला होता. यासाठी ५५० मेट्रिक टन वजनाच्या लोखंडी तुळईची स्थानांतरण प्रक्रिया १४ ऑक्टोबर २०२४ रोजी सुरू झाली होती.

रेल्वे प्रशासनाच्या परवानगीनंतर मेसर्स राईट्स लिमिटेड यांच्या तांत्रिक पर्यवेक्षणाखाली कामकाज करण्यात आले. बृहन्मुंबई महानगरपालिका आयुक्त श्री. भूषण गगराणी यांच्या मार्गदर्शनाखाली पूल विभागाने मध्य रेल्वे प्रशासनासह योग्य समन्वय साधत हे काम यशस्वीरीत्या पार पाडले.

सुमारे ७० मीटर लांब आणि ९.५० मीटर रुंद असलेली तुळई ५५० मेट्रिक टन वजनाची आहे. तुळई अधांतरी (कॅण्टीलिवर) स्थितीत ठेवण्यात आली होती आणि रेल्वे ट्रॅकवर साईड शिफ्टिंग करून बसवली गेली. लोखंडी सळया बसवून सिमेंट कॉंक्रिटीकरणाचे काम लवकरच पूर्ण होईल. तसेच पुलाच्या प्रवेश मार्गिकांचे काम हाती घेतले जाईल.

पूलाचा उर्वरित भाग आणि दुसरी तुळई डिसेंबर २०२४ पर्यंत पूर्ण करण्यात येणार आहे, ज्यामुळे कर्नाक पूल लवकरच वाहतुकीसाठी खुला होईल.