महायुतिला मिळत असलेल्या अपार समर्थनामुळे हताश विरोधकांकडून बिनबुडाचे आरोप; निवडणूक आयोगाने निष्पक्ष चौकशी करावी - विनोद तावडे

19November 2024

नालासोपारा:* आगामी निवडणुकीच्या पार्श्वभूमीवर नालासोपारा येथे काल आचारसंहितेच्या पालनाबाबत आयोजित केलेल्या बैठकीत महायुतीच्या कार्यप्रणालीवर विरोधकांकडून आरोप-प्रत्यारोप झाले. या संदर्भात भारतीय जनता पक्षाचे नेते विनोद तावडे यांनी प्रतिक्रिया देताना सांगितले की, "महायुतीला जनतेकडून मिळत असलेले अपार समर्थन पाहून विरोधक हतबल झाले आहेत. त्यामुळेच ते बिनबुडाचे आरोप करत आहेत आणि वातावरण बिघडवण्याचा प्रयत्न करत आहेत."

तावडे पुढे म्हणाले की, "बैठकीत बहुजन विकास आघाडीच्या कार्यकर्त्यांनी येऊन गोंधळ घातला आणि मुद्दाम आचारसंहिता भंगाचा आरोप लावण्याचा प्रयत्न केला. मात्र, हे सर्व आरोप बेबुनियाद आहेत. निवडणूक आयोगाने या प्रकरणाची सखोल आणि निष्पक्ष चौकशी करावी, अशी आमची मागणी आहे."

यावेळी तावडे यांनी महायुतीच्या यशाबद्दल आत्मविश्वास व्यक्त केला आणि जनतेने सकारात्मक प्रतिसाद देऊन विरोधकांच्या कटकारस्थानांना उत्तर द्यावे, असे आवाहन केले.