महायुती वचननाम्याचे सर्व आश्वासने पूर्ण करण्यास वचनबद्ध – आनंद परांजपे
- MimTimes मिम टाइम्स م ٹائمز
- Jan 25
- 1 min read
25 January 2025
मुंबई, महायुतीच्या वचननाम्यातील शेतकऱ्यांशी संबंधित सर्व आश्वासने पूर्ण करण्याची नैतिक जबाबदारी महायुतीवर आहे, असे राष्ट्रवादी काँग्रेसचे मुख्य प्रवक्ते आनंद परांजपे यांनी स्पष्ट केले आहे. शेतकऱ्यांच्या कर्जमाफीवरून महायुतीमध्ये कोणताही मतभेद नसल्याचे त्यांनी सांगितले.
परांजपे म्हणाले की, “माध्यमांमध्ये राष्ट्रवादी काँग्रेसचे राष्ट्रीय अध्यक्ष आणि उपमुख्यमंत्री अजितदादा पवार यांनी कर्जमाफीला विरोध केला असल्याच्या चुकीच्या चर्चा सुरू आहेत. या चर्चा निराधार आहेत. महायुती आपल्या वचननाम्यातील प्रत्येक आश्वासन पूर्ण करणार आहे.”
त्यांनी अजित पवार यांच्या व्यस्त वेळापत्रकाचा उल्लेख करत सांगितले की, “गेल्या दहा दिवसांत अजित पवार अर्थ व वित्त नियोजन मंत्री म्हणून सर्व विभागीय मंत्र्यांसोबत, सचिव, उपसचिव यांच्यासोबत बैठका घेत आहेत. मार्चमध्ये सादर होणाऱ्या अर्थसंकल्पात राज्याच्या आर्थिक नियोजनाचे स्पष्ट चित्र दिसेल. मागील वर्षाच्या घोषणा आणि त्यानुसार झालेले खर्च यांची तपशीलवार समीक्षा केली जात आहे.”
महायुतीने आपल्या वचननाम्यात शेतकऱ्यांसाठी दिलेली सर्व आश्वासने मार्चमधील अर्थसंकल्पात प्रतिबिंबित होतील, असे त्यांनी सांगितले. बळीराजाला कर्जमाफी नाकारली जाईल, अशा खोडसाळ बातम्या माध्यमांनी थांबवाव्यात, असा सल्लाही त्यांनी दिला.
परांजपे यांनी पुन्हा एकदा ठामपणे सांगितले की, बळीराजा हा राष्ट्रवादी काँग्रेसच्या विकासाच्या केंद्रस्थानी आहे. “महायुती शेतकऱ्यांच्या कल्याणासाठी वचनबद्ध असून त्यांची प्रगती सुनिश्चित करणे हे आमचे ध्येय आहे,” असेही ते म्हणाले.
पत्रकार परिषदेदरम्यान, पत्रकारांनी विचारलेल्या इतर अनेक प्रश्नांना परांजपे यांनी सविस्तर उत्तरे दिली. महायुतीच्या वचननाम्याच्या अंमलबजावणीसाठी सरकार प्रामाणिकपणे कार्यरत असल्याचे त्यांनी अधोरेखित केले.
Video
