महावाचन उत्सव २०२४: विद्यार्थ्यांच्या सर्वांगीण विकासासाठी वाचन महोत्सव

मुंबई, १२ सप्टेंबर: विद्यार्थ्यांमध्ये वाचनाची आवड निर्माण करून त्यांच्या व्यक्तिमत्व विकासासाठी शालेय शिक्षण विभागाने "महावाचन उत्सव २०२४" सुरू केला आहे. राज्यातील सुमारे ९७,००० शाळांमधून १२ लाखांहून अधिक विद्यार्थी या उपक्रमात सहभागी झाले आहेत, अशी माहिती महाराष्ट्र प्राथमिक शिक्षण परिषदेच्या राज्य प्रकल्प संचालक आर. विमला यांनी दिली.

मोबाइल फोन, टीव्ही आणि संगणकांच्या वाढत्या वापरामुळे सध्या मुले पुस्तक वाचण्यापासून दूर जात आहेत. अशा परिस्थितीत विद्यार्थ्यांना पुन्हा वाचनाची गोडी लावण्यासाठी हा महावाचन उत्सव २० सप्टेंबर २०२४ पर्यंत चालणार आहे.

महावाचन उत्सवाचे ब्रँड अॅम्बेसेडर अमिताभ बच्चन

प्रसिद्ध अभिनेते अमिताभ बच्चन यांची या उपक्रमासाठी ब्रँड अॅम्बेसेडर म्हणून निवड करण्यात आली असून, त्यांनी दररोज किमान १० मिनिटे काहीतरी नवं वाचण्याचे आवाहन केले आहे. मागील वर्षी झालेल्या 'महाराष्ट्र वाचन चळवळी'च्या यशस्वी प्रतिसादानंतर हा महोत्सव सुरू करण्यात आला आहे. मागील उपक्रमात ६६,००० शाळा आणि ५२ लाख विद्यार्थी सहभागी झाले होते.

उद्दिष्टे

विद्यार्थ्यांमध्ये वाचनाची आवड निर्माण करणे, त्यांची सर्जनशीलता, भाषा कौशल्य आणि व्यक्तिमत्व विकास साधणे हे या उत्सवाचे प्रमुख उद्दिष्ट आहे. विशेषत: मराठी भाषेतील उत्कृष्ट साहित्य, लेखक आणि कवींची ओळख विद्यार्थ्यांना करून देणे हे या उपक्रमाचे आणखी एक उद्दिष्ट आहे.

उपक्रमाचे स्वरूप

इयत्ता तिसरी ते बारावी या विद्यार्थ्यांसाठी तीन गट करण्यात आले आहेत (तिसरी ते पाचवी, सहावी ते आठवी, नववी ते बारावी). या गटातील विद्यार्थी त्यांच्या आवडत्या पुस्तकाचे वाचन करून त्यावर लेख लिहणार आहेत. तसेच, विद्यार्थ्यांना वाचलेल्या पुस्तकावर प्रतिक्रिया देण्यासाठी एक मिनिटांचा व्हिडिओ किंवा ऑडिओ क्लिप अपलोड करण्याची सोयही उपलब्ध आहे.

परीक्षा आणि पुरस्कार

प्रत्येक गटात विद्यार्थ्यांनी लिहिलेल्या पुस्तकांच्या समीक्षणावर आधारित प्रथम, द्वितीय आणि तृतीय क्रमांकाच्या विद्यार्थ्यांची निवड केली जाणार आहे. विजेत्या विद्यार्थ्यांना पुस्तकांचे बक्षीस आणि सर्व सहभागी विद्यार्थ्यांना प्रमाणपत्र देण्यात येणार आहे.

पुस्तक प्रदर्शन आणि मेळावे

विद्यार्थ्यांमध्ये वाचनाची आवड निर्माण करण्यासाठी राज्यातील प्रत्येक तालुक्यात पुस्तक प्रदर्शन आणि मेळावे आयोजित करण्यात आले आहेत. या प्रदर्शनांमध्ये विद्यार्थी, पालक आणि शिक्षकांना नवीन पुस्तके समजावून घेता येणार आहेत.