महाविकास आघाडीत जागावाटपावर एकमत, काहीच मतभेद नाहीत: रमेश चेन्नीथला

मुंबई, दि. १९ ऑक्टोबर २०२४ - आगामी विधानसभा निवडणुका एकत्रित लढवण्यासाठी महाविकास आघाडी (मविआ) मध्ये कोणतेही मतभेद नाहीत, अशी स्पष्ट भूमिका मविआचे प्रभारी रमेश चेन्नीथला यांनी मांडली आहे. जागावाटपाची प्रक्रिया अंतिम टप्प्यात असून, पुढील दोन दिवसांत ती पूर्ण होईल, असे त्यांनी स्पष्ट केले. शिवसेना, काँग्रेस आणि राष्ट्रवादी काँग्रेस या तिन्ही पक्षांमध्ये जागावाटपावर चर्चा सुरू असून, एकमताने निर्णय घेतला जाईल, असे त्यांनी सांगितले.

रमेश चेन्नीथला यांनी शिवसेना पक्षप्रमुख उद्धव ठाकरे यांची मातोश्री येथे भेट घेतल्यानंतर पत्रकारांशी संवाद साधला. यावेळी त्यांच्यासोबत काँग्रेसचे प्रदेश कार्याध्यक्ष नसीम खान, शिवसेनेचे खासदार संजय राऊत आणि काँग्रेसचे नाना पटोले उपस्थित होते.

महायुतीने मुख्यमंत्रीपदाचा चेहरा जाहीर करावा - नाना पटोले

काँग्रेस प्रदेशाध्यक्ष नाना पटोले यांनी महायुतीला आव्हान देत म्हटले की, "मुख्यमंत्रीपदाचा चेहरा कोण आहे, हे त्यांनी जाहीर करावे." त्यांनी आरोप केला की, भ्रष्ट महायुती सरकारने महाराष्ट्रात जमिनी विकण्याचा प्रयत्न सुरू केला आहे, आणि जनतेच्या निधीचा गैरवापर करीत आहे. काँग्रेसने निवडणूक आयोगाकडे केलेल्या तक्रारीनंतर 'योजनादूत'सह अनेक निर्णय सरकारला रद्द करावे लागले.

नाना पटोले यांनी भाजपा आणि आरएसएसवरही टीका करत म्हटले की, "भाजपात प्रवेश केल्यानंतर कोणताही गुन्हेगार स्वच्छ होतो," आणि त्यांनी बाबा सिद्दीकी आणि नवाब मलिक प्रकरणाचे उदाहरण दिले.

काँग्रेसच्या वरिष्ठ निरीक्षकांची बैठक संपन्न, विधानसभा निवडणुकीवर चर्चा

टिळक भवन येथे काँग्रेसच्या वरिष्ठ निरीक्षकांची महत्वाची बैठक पार पडली. या बैठकीत विधानसभा निवडणुकीसंदर्भात सविस्तर चर्चा करण्यात आली. बैठकीला काँग्रेस प्रभारी रमेश चेन्नीथला, राजस्थानचे माजी मुख्यमंत्री अशोक गहेलोत, छत्तीसगडचे माजी मुख्यमंत्री भूपेश बघेल, माजी मुख्यमंत्री पृथ्वीराज चव्हाण आणि काँग्रेसचे अनेक वरिष्ठ नेते उपस्थित होते.

या बैठकीत महाराष्ट्रातील विधानसभा निवडणुका एकत्रितपणे जिंकण्याचा निर्धार करण्यात आला. काँग्रेसचे सर्व नेते एकत्र येऊन आगामी निवडणुकीत विजयी होण्यासाठी तयारी करत आहेत, असे चेन्नीथला यांनी सांगितले.