मुंबई महापालिकेचा ७४,४२७ कोटी रुपयांचा अर्थसंकल्प सादर

4 February 2025

मुंबई,मुंबई महापालिकेचा तब्बल ७४ हजार ४२७ कोटी रुपयांचा सकारात्मक आणि विकासाभिमुख अर्थसंकल्प आज आयुक्त भूषण गगराणी आणि अतिरिक्त आयुक्त अभिजित बांगर यांनी सादर केला. कोणतीही करवाढ, शुल्कवाढ किंवा भुर्दंड नसलेला हा अर्थसंकल्प मुंबईच्या उज्वल भविष्यासाठी महत्त्वाचा टप्पा ठरेल, असा विश्वास व्यक्त केला जात आहे.

या अर्थसंकल्पात तब्बल ४३ हजार कोटी रुपये विविध विकासकामांसाठी खर्च करण्यात येणार आहेत. ही रक्कम भांडवली खर्चातील विक्रमी वाढ दर्शवते. महापालिकेच्या उत्पन्नात सात हजार कोटींची वाढ झाल्याने प्रशासनाच्या कामगिरीचे कौतुक केले जात आहे.

मुंबईकरांच्या सोयीसाठी 'बेस्ट' साठी एक हजार कोटी रुपयांची तरतूद करण्यात आली आहे. यासोबतच मुंबईतील पर्यटनाला चालना देण्यावर आणि प्रवास अधिक वेगवान करण्यावर भर देण्यात आला आहे.

प्रदूषणमुक्त, खड्डेमुक्त आणि भ्रष्टाचारमुक्त मुंबई हे उद्दिष्ट साध्य करण्यासाठी प्रशासन प्रयत्नशील आहे. पंतप्रधान नरेंद्र मोदी यांच्या नेतृत्वाखाली मुंबई ग्लोबल शहर आणि देशाचे फिनटेक कॅपिटल म्हणून आकार घेत असल्याचे या अर्थसंकल्पातून स्पष्ट होत आहे.

हा अर्थसंकल्प विद्यार्थी, चाकरमानी, उद्योजक तसेच गरीब कष्टकऱ्यांच्या आरोग्य, स्वच्छता आणि शिक्षणाच्या गरजा लक्षात घेऊन तयार करण्यात आला आहे. मुंबईचा खरा विकास काय असतो, हे यामुळे सर्वांना समजेल, अशी भावना व्यक्त होत आहे.

मुंबईकरांसाठी विकासाची नवी दिशा देणाऱ्या या अर्थसंकल्पाबद्दल महापालिका प्रशासनाचे सर्व स्तरांवरून अभिनंदन करण्यात येत आहे.