मुख्यमंत्री एकनाथ शिंदे, चित्रा वाघ आणि नीलम गोऱ्हे यांचा अरविंद सावंत यांच्या अपमानास्पद विधानाचा निषेध

2 November 2024

मुंबई: शिवसेनेचे खासदार अरविंद सावंत यांनी भाजपाच्या मुंबादेवी मतदारसंघातील उमेदवार शायना एन.सी. यांच्याबाबत "इंपोर्टेड माल चालणार नाही" असे वक्तव्य करून महाराष्ट्रातील महिलांचा अपमान केला आहे. मुख्यमंत्री एकनाथ शिंदे, भाजप महिला प्रदेशाध्यक्ष चित्रा किशोर वाघ आणि शिवसेना नेत्या डॉ. नीलम गोऱ्हे यांनी या वक्तव्याचा तीव्र निषेध केला आहे.

मुख्यमंत्री एकनाथ शिंदे यांनी सांगितले, "महाराष्ट्राला माता जिजाऊ आणि सावित्रीबाई फुले यांच्यासारख्या थोर परंपरेचा वारसा लाभला आहे. स्त्री सन्मान मराठी माणसाच्या संस्कृतीचा भाग आहे. अशा अपमानास्पद वक्तव्यांना महाराष्ट्रात स्थान नाही. आम्ही प्रत्येक महिलेला लाडकी बहिण मानतो आणि तिचा सन्मान आणि उन्नती हाच आमचा ध्यास आहे."

चित्रा किशोर वाघ यांचा निषेध

भाजपाच्या महिला प्रदेशाध्यक्ष चित्रा किशोर वाघ यांनी देखील सावंत यांच्या विधानावर संताप व्यक्त केला आहे. त्यांनी म्हटले, "महिलांचा अपमान करणाऱ्या अशा खालच्या स्तरावरचे शब्द महाराष्ट्र सहन करणार नाही. महाराष्ट्रातील स्त्रिया पराक्रमी आणि पुरोगामी आहेत. शिवसेनेचे नेते अशा विकृत विचारांची पातळी गाठत आहेत, हे दुर्दैवी आहे."

नीलम गोऱ्हेंची तीव्र प्रतिक्रिया आणि तक्रारीची तयारी 

शिवसेना नेत्या डॉ. नीलम गोऱ्हे यांनी अरविंद सावंत यांच्या विधानाचा निषेध करत तीव्र शब्दांत नाराजी व्यक्त केली आहे. "महिलांविषयी असे अपमानास्पद शब्द खपवून घेतले जाणार नाहीत," असे त्यांनी ठामपणे सांगितले. गोऱ्हे यांनी निवडणूक आयोगाकडे सावंत यांच्या विधानाविरोधात लेखी तक्रार दाखल करण्याची तयारी असल्याचे जाहीर केले