राज्य सरकारकडून आचारसंहितेचा भंग; विरोधी पक्षनेते अंबादास दानवे यांनी निवडणूक आयोगाला केली चौकशीची मागणी

मुंबई - विधानसभा निवडणुकीची घोषणा होऊन आचारसंहिता लागू झाल्यानंतरही राज्य सरकारने घेतलेल्या निर्णयांमुळे आचारसंहितेचा भंग झाल्याचा आरोप विरोधी पक्षनेते अंबादास दानवे यांनी केला आहे. त्यांनी या प्रकरणाची चौकशी करण्याची मागणी करत केंद्रीय निवडणूक आयोगाचे आयुक्त आणि राज्याचे मुख्य निवडणूक अधिकारी यांना पत्र लिहिले आहे.

मंगळवार, 15 ऑक्टोबर, 2024 रोजी महाराष्ट्रात विधानसभा निवडणुकीची आचारसंहिता लागू झाली. आचारसंहितेच्या नियमांनुसार, निवडणूक प्रक्रियेत सर्व पक्षांना समान संधी मिळावी आणि कोणत्याही पक्षाला अनावश्यक फायदा होऊ नये यासाठी राज्य शासनास महत्त्वाचे निर्णय घेण्यास प्रतिबंध आहे. मात्र, आचारसंहिता लागू झाल्यानंतरच महाराष्ट्र शासनाच्या संकेतस्थळावर एका दिवसात 259 शासन निर्णय प्रसिद्ध केले गेले. यात अनेक वित्तीय आणि धोरणात्मक निर्णयांचा समावेश असल्याचा आरोप करण्यात आला आहे.

यासोबतच, 27 महामंडळांवर अध्यक्ष आणि उपाध्यक्षांच्या नियुक्त्या करण्यात आल्या आहेत. या नियुक्त्यांमध्ये काही लोकांचे राजकीय पुनर्वसन करण्याचा प्रयत्न असल्याचा आरोप देखील दानवे यांनी केला आहे. त्यामुळे सत्ताधारी पक्षाला निवडणूक प्रक्रियेत अप्रत्यक्ष फायदा मिळणार असल्याचा दावा त्यांनी केला आहे.

दानवे यांनी आपल्या पत्रात या निर्णयांची चौकशी करून आचारसंहितेनंतर घेतलेले सर्व निर्णय रद्द करण्याची मागणी केली आहे. तसेच बेकायदेशीरपणे निर्णय घेणाऱ्या दोषी व्यक्तींवर कठोर कारवाई करण्याचे आवाहनही केले आहे. या प्रकरणावर तातडीने निवडणूक आयोगाने लक्ष देऊन योग्य ती कारवाई करावी, अशी मागणी विरोधी पक्षनेते अंबादास दानवे यांनी केली आहे.