शायना एनसी यांच्याबद्दल केलेल्या विधानाबाबत अरविंद सावंत यांची माफी

2 November 2024

मुंबई,शिवसेना (उद्धव बाळासाहेब ठाकरे) पक्षाचे खासदार अरविंद सावंत यांनी भाजपच्या माजी नेत्या शायना एनसी यांच्यावर केलेल्या टिप्पणीबद्दल माफी मागितली आहे. सावंत यांनी स्पष्ट केले की, त्यांच्या विधानाचा विपर्यास करून राजकीय फायद्यासाठी मुद्दामून चुकीच्या अर्थाने सादर केले गेले.

शुक्रवारी सोशल मीडियावर व्हायरल झालेल्या एका व्हिडिओमध्ये अरविंद सावंत यांनी शायना एनसी यांचा उल्लेख "इम्पोर्टेड माल" असा केल्याचा दावा करण्यात आला होता. या विधानामुळे सावंत यांच्यावर सर्वच स्तरातून टीकेची झोड उठली. त्यावर सावंत म्हणाले, "माझ्या विधानाचा कोणालाही दुखवण्याचा किंवा अपमान करण्याचा हेतू नव्हता. जर माझ्या शब्दांमुळे कुणाला दुखावले गेले असेल तर मी मन:पूर्वक माफी मागतो."

शायना एनसी यांनी सावंत यांच्या विधानाचा निषेध करताना नागपाडा पोलीस ठाण्यात तक्रार नोंदवली आहे. शायना एनसी यांनी सावंत यांच्या विधानावर कठोर प्रतिक्रिया देत सांगितले की, "हे विधान अरविंद सावंत आणि त्यांच्या पक्षाचा महिलांविषयीचा दृष्टिकोन दाखवते. त्यांना प्रत्येक महिलेकडे ‘माल’ म्हणूनच पहायचं आहे का?" तिने सांगितले की, "सावंत यांच्या वर्तणुकीवर मी काय कारवाई करणार हे महत्वाचे नाही; लोक त्यांना योग्य धडा शिकवतील."

शिवसेना नेते अरविंद सावंत यांनी सांगितले की, शायना एनसी यांना मुद्दाम तक्रार दाखल करण्यास प्रवृत्त केले गेले आहे. त्यांचा आरोप आहे की, सत्ताधारी महायुतीने त्यांच्यावर खोटा आणि अपमानास्पद आरोप लावून चुकीचे चित्र उभे करण्याचा प्रयत्न केला आहे. "त्या पक्षातील एका मंत्र्यावर बलात्काराचा आरोप आहे, तर मागील आठवड्यात एका तरुणीने त्यांच्या एका नेत्यावर बदनामी केल्याचा आरोप करत तक्रार दाखल केली आहे," असे सावंत म्हणाले.

दरम्यान, शायना एनसी यांनी भाजप सोडून मुख्यमंत्री एकनाथ शिंदे यांच्या नेतृत्वाखालील शिवसेना पक्षात प्रवेश केला असून, त्यांना येत्या २० नोव्हेंबर रोजी होणाऱ्या विधानसभा निवडणुकीसाठी मुम्बादेवी मतदारसंघातून उमेदवारी देण्यात आली आहे.