सैफी बुरहानी एक्सपो तर्फे "गो ग्रीन पुणे" रॅली यशस्वी
- MimTimes मिम टाइम्स م ٹائمز
- Dec 29, 2024
- 1 min read
29 December 2024
पुणे - पुणे शहर हरित आणि प्रदूषणमुक्त करण्याच्या उद्देशाने दाउदी बोहरा समाजाच्या वतीने आयोजित चौथे सैफी बुरहानी एक्सपो पुणे 2025 तर्फे "गो ग्रीन पुणे" रॅलीचा आज यशस्वी समारोप झाला. 29 डिसेंबर 2024 रोजी सकाळी 9.30 वाजता कॅम्प येथे या रॅलीला सुरुवात झाली.
या रॅलीत समाजाचे प्रमुख जानब अब्दली भाईसाब - अमिल साब पुणे, जानब इदरीस भाईसाब, मोइज़ जमाली, हुज़ेफा परदावाला, कुरेश घोडनादिवाला, फखरुद्दीन चोपड़ावाला, हमजा छत्रिस आणि अब्दुल कादिर सद्भावना यांच्यासह लहान मुलांपासून वृद्धांपर्यंत अनेक जणांनी उत्साहाने सहभाग घेतला.
या रॅलीत 12 कार्स आणि 60 बाइक्सचा समावेश होता. ग्रीन पुणे कॅम्पेनचे पोस्टर्स लावून वाहनांनी कॅम्प ते डेक्कन कॉलेज ग्राऊंडपर्यंतचा मार्ग गाठला. मार्गामध्ये सोलापूर रोड, हडपसर, फातिमानगर, वानवडी, साळुंके विहार, एनआयबीएम, फाखरी हिल्स, एमजी रोड, लक्ष्मी रोड, डेक्कन, फर्ग्युसन कॉलेज रोड, पुणे विद्यापीठ रोड, बंड गार्डन रोड, कल्याणी नगर, विमान नगर यांचा समावेश होता.
सैफी बुरहानी एक्सपो गेल्या तीन वर्षांपासून आयोजित केला जातो असून यंदा चौथ्या वर्षात पदार्पण करीत आहे. सैफी बुरहानी एक्सपो पुणे 2025 येत्या 4 जानेवारी ते 6 जानेवारी 2025 दरम्यान डेक्कन कॉलेज ग्राऊंड येथे होणार आहे. या हरित पुणे मोहिमेचा व्यापक प्रचार आणि प्रसार करण्यासाठीच "गो ग्रीन पुणे" रॅलीचे आयोजन करण्यात आले होते.
ही रॅली केवळ पुण्याच्याच नाही तर संपूर्ण देशभरातील पर्यावरणप्रेमींना हरित जीवनशैलीचा संदेश देणारी ठरली आहे. आयोजकांनी यापुढेही अशा उपक्रमांद्वारे हरित मोहिमेला चालना देण्याचा संकल्प व्यक्त केला.
Video
संपादक: मिम टाइम्स
