राष्ट्रवादी काँग्रेसमध्ये मोठे संघटनात्मक बदल: अजित पवारांकडून संजय खोडके यांची 'संघटन महासचिव' पदी नियुक्ती

14 October 2025

मुंबई,राष्ट्रवादी काँग्रेस पक्षाचे राष्ट्रीय अध्यक्ष आणि राज्याचे उपमुख्यमंत्री अजित पवार यांनी आज पक्षाच्या संघटनात्मक पुनर्रचनेच्या दिशेने एक महत्त्वाचे पाऊल उचलले आहे. पक्षाचे ज्येष्ठ नेते आणि विधानपरिषद सदस्य संजय खोडके यांची ‘संघटन महासचिव’या महत्त्वपूर्ण पदावर नियुक्ती करण्यात आली आहे. पक्षाच्या संघटनेतील अडथळे दूर करून तळागाळातील संवाद अधिक प्रभावी बनवण्यासाठी हे नवे पद निर्माण करण्यात आले आहे.

गेल्या काही महिन्यांपासून राष्ट्रवादीकडून 'चिंतन शिबिर' आणि 'परिवार मिलन' सारख्या उपक्रमांद्वारे पक्ष वाढवण्याचे प्रयत्न सुरू आहेत, ज्याला आता या नव्या पदनिर्मितीमुळे आणखी बळ मिळणार आहे. संजय खोडके यांच्या नियुक्तीमुळे कार्यकर्त्यांना त्यांच्या अडचणी आणि सूचना थेट पक्ष संघटनेपर्यंत पोहोचवण्यासाठी एक निश्चित आणि जबाबदार माध्यम उपलब्ध झाले आहे, ज्यामुळे राज्य नेतृत्व आणि जिल्हा पातळीवरील संघटनांमध्ये समन्वय अधिक बळकट होईल.

एनएससीआय, वरळी येथे आज उपमुख्यमंत्री अजित पवार यांच्या उपस्थितीत सर्व आमदार आणि जिल्हाध्यक्ष यांची महत्त्वाची बैठक पार पडली. या बैठकीत खोडके यांच्या नियुक्तीची घोषणा करण्यात आली. आगामी स्थानिक स्वराज्य संस्था निवडणुकांच्या पार्श्वभूमीवर पक्षाच्या संघटनात्मक तयारीचा रोडमॅप या बैठकीत ठरवण्यात आला. कार्यकर्त्यांशी संवाद आणि समन्वय अधिक बळकट करण्यासाठी पक्षाचे ‘राष्ट्रवादी कनेक्ट’ हे नवीन मोबाईल अॅप देखील लाँच करण्यात आले.

यासोबतच, बूथ स्तरावर संघटन मजबूत करणे, नियमितपणे जिल्हानिहाय ‘राष्ट्रवादी परिवार मिलन’ कार्यक्रमांचे आयोजन करणे आणि आमदार व जिल्हाध्यक्ष यांच्यातील संवाद सुलभ करण्यावर लक्ष केंद्रित करण्यात आले. पक्ष नेतृत्वाने यावेळी कार्यकर्त्यांना शिस्त, संघभावना आणि जबाबदारी या मूलभूत मूल्यांना प्राधान्य देण्याचा स्पष्ट संदेश दिला. संघटनात्मक उपक्रमांचे मूल्यमापन करणे आणि पुढील काही महिन्यांसाठी जनसंपर्काचे स्पष्ट उद्दिष्ट निश्चित करण्यावर बैठकीत सविस्तर विचारमंथन झाले. अजित पवारांनी संघटना अधिक गतिमान आणि आधुनिक तंत्रज्ञानावर आधारित बनवण्याचा निर्धार या नियुक्तीद्वारे दर्शवला आहे.

#AjitPawar #NCP #SanjayKhodke #राष्ट्रवादीकाँग्रेस #संघटनमहासचिव #MaharashtraPolitics #राजकारण #NCPOrganisation #स्थानिकस्वराज्यसंस्था #राष्ट्रवादीकनेक्ट #वरळीबैठक #MahavikasAghadi